كراكيب

محمد محمود مرة أخرى

2012-02-03T18:12:00.000-08:00

عدت .. وكالمعتاد العود ليس احمد على الاطلاق .. دائماً العودة مرتبطة بمصيبة ما ..

كنت في البداية احب هذة المدونة .. وكنت اعتبرها مكان لتفريغ الشحنات غير المستقرة من افكاري .. ولكن شيئاً فشيء ارتبطت بأحداث وذكريات سيئة .. ارتبطت بها ارتباط وثيق فكلما حدثت أزمة ما عادت المدونة للظهور في حياتي .. حتى اني بدأت اتساءل عما اذا كانت العلاقة عكسية ايضاً .. فربما اذا اغلقت هذة المدونة لتوقفت الأزمات عن الظهور .. لكنه تفكير طفولي ساذج بالطبع

انه محمد محمود مرة أخرى .. تشابهات كثيرة واختلافات كثيرة مع المرة السابقة

تشابه في ضباب الغاز المسيل للدموع برائحته المميزة .. وصوت اطلاق الخرطوش المستمر

تشابه في نواح سيارات الاسعاف المهرولة من والى الشارع .. وسيل الموتوسيكلات المسعفة وقائديها ذوي الأعين المدمعة من أثر الغاز .. أو من هول ما يرى من اصابات .. أو كليهما

تباً للتفكير المنطقي ..

لماذا لا استطيع ان ارى هدف لما يحدث ؟

في المرة الأولى كان الهدف واضح .. منع الأمن من دخول الميدان لحماية المعتصمين بداخله ..

ولكن لكم اتمنى ان أجد هدفاً مقنعاً لما يحدث الآن في محيط وزارة الداخلية

يحدثني البعض عن تخاذل الداخلية في حماية مشجعي النادي الأهلي في بورسعيد وكيف انهم كانوا يشاهدون البشر يقتلون بعضهم البعض دون تدخل منهم .. ويحدثني البعض الآخر عن مؤامرة ما من الأمن لتأديب شباب الألتراس عقاباً لهم على دورهم البارز أثناء وبعد الثورة

فأبادره بالسؤال "أيوة يعني انتا بتضرب في وزارة الداخلية ليه دلوقت ؟" .. فينعقد لسانه ولا يجد رداً منطقياً إلا ما على وزن "أصلهم ولاد ..... عمرهم ما هاينضفوا ابدأ"

لا جدال على ان ما فعله الأمن -أو بالأحرى ما لم يفعله- هو جريمة حقيقية .. ولكن حتى هذا لا يبرر الهجوم على وزارة الداخلية.

الأمر يشبه موظف في شركة اهمل اهمالاً جسيماً في عمله تسبب في خسائر فادحة للشركة .. فلكي ينتقم منه، ذهب مدير الشركة الى بيت هذا الموظف وقام بضرب ابيه علقة ساخنة !

لا علاقة بين الفعل ورد الفعل ..

ولكنه بالرغم من ذلك رد فعل مقدر ومفهوم .. هو نتاج طبيعي لأقتناع الناس التام بتآمر افراد السلطة عليهم وعلى الثورة وعلى مصلحة البلد .. بما يجعلهم بنظرون الى اي شيء يحدث على انه مؤامرة ضدهم .. ولنا في حادثة الحواوشي عبرة.

اتفهم الغضب والألم في صدور الناس مما حدث .. واتفهم ما يفعلونه بدافع الغضب .. ولكن منذ متى ينتج الغضب قرار حكيم ؟

تباً للغباء ..

اكبر خطأ ارتكبته وزارة الداخلية هذة المرة هو استخدام القنابل المسيلة للدموع ..

القنابل لم تعد تفرق الناس كما كان الغرض منها .. بل اصبحت تشحن الناس وتحشدهم اكثر .. فكلما شعروا بألم اعينهم وصدورهم ازدادت كراهيتهم للسلطة .. وازدادت رغبتهم في الثأر من "ولاد ال .... اللي فاشخينا غاز مالصبح"

في رأيي الشخصي أن لربما كان تأثير مدافع الماء في هذا الجو قارص البرودة أشد وطأة من الرصاص الحي .. دون أن تقتل أحداً

ولكن تباً للغباء ..

وتباً لذاكرتنا السمكية ..

امس كنا نشيد -بتحفظ- بأداء وزير الداخلية الجديد وكيف انه اعاد تشغيل آلة الشرطة الخربة المعطلة .. واليوم ننادي باقالته ومحاكمته لتقصيره في تأمين مباراة بورسعيد

قاطاع ليس بالقليل من الناس واصحاب الرأي يرون ان ما يحدث من حوادث سطو مسلح وسرقة بالاكراه وخطف وأخيراً احداث بورسعيد ما هي اى حرب شرسة من اصحاب المصالح والفاسدين بوزارة الداخلية ضد وزير داخليتهم لأنه يقوم بعمل جيد في عودة الأمن للبلاد

أنا اشجع هذا الرأي بتحفظ .. ولكني مقتنع تماماً بأن وزير الداخلية مظلوم في ما حدث في بورسعيد .. واتعشم ان تثبت الأيام ذلك.

أما عن الأزمة القائمة .. فليرحم الله الأرواح التي تزهق .. وليعوض خيراً عن العيون التي تفقأ .. وليلهمنا الحكمة لنفرق بين الحق والباطل .. اللهم آمين.

كفروا بالثورة

2011-12-22T03:16:00.000-08:00

يعيش الثوار في الايام الأخيرة تحت ضغط نفسي شديد القسوة .. فالصورة قاتمة بالفعل ..

يسقط يومياً شهداء جدد .. تخلت عنهم معظم القوى السياسة ان لم تكن كلها .. الاعلام يقود ضدهم حملة شديدة الشراسة ادت بالضرورة الى كراهية الأغلبية الصامتة للثورة والثوار

مجملاً .. يشعر الثوار انهم يقفون بمفردهم تماماً في مواجهة العالم وعددهم يتناقص يوماً بعد يوم

هذا الضغط دفع بعضهم دفعاً الى - ياللحسرة- الكفر بثورته وببلده وبشعب بلده

اصبح اعتيادياً ان اسمع احدهم يقول : البلد دي ماتستاهلناش .. الشعب دا مايستاهلش دم اللي ماتوا .. انا عايز اهاجر من البلد دي خلاص زهقت .. احنا بنحارب عشان مين ؟ عشان ناس بتخوننا وبتقول علينا بلطجية ومأجورين ؟

انها ظاهرة شديدة الخطورة وبدأت في الانتشار بشكل واسع .. واستمرار انتشارها سيؤدي بالضرورة الى احد امرين .. اما ان ييأس البعض من التغيير فينضم الى صفوف الصامتين المتفرجين .. او ان تتغير اهدافه الثورية من افادة البلد الى افادة نفسه وعشيرته من الثوريين -من باب ان البلد نفسها مش عايزة تتفاد -

لا تلوم الجاهل على جهله .. ولكن لُم من لم يعلمه

المرحلة القادمة تتطلب منا جميعاً أن نشد من أزر بعضنا البعض .. وأن نحتفظ بثبات اعصابنا قدر المستطاع ..

الثورة منتصرة .. والله غالب.

..وتبدأ المرحلة الأخيرة

2011-12-17T01:36:00.000-08:00

بدأوا بتبني الثورة عندما كان الشعب متبنيها ..

ثم بدأوا بانتقادها وتوجيه الرأي العام ضدها

ثم انقضوا عليها عندما ضمنوا مساندة الرأي العام

وتبدأ المرحلة الأخيرة .. مرحلة تصفية الثوار بنزع لقب "ثوار" منهم والصاق لقب "مخربين" بهم .. وبذلك يعطوا لأنفسهم الحق في التعامل بأي طريقة يرونها مناسبة لأنقاذ البلد من هؤلاء المخربين وبمساندة شعبية كاملة

متلازمة محمد محمود ..

2011-12-11T23:26:00.000-08:00

لا اشعر برغبة في الكتابة .. لا اشعر برغبة في الحديث .. لا اشعر برغبة في اي شيء

ليس من السهل ان تصف احساس هو اقرب الى اللا احساس

لافرح .. لاحزن .. لاملل .. لاحماس .. لاغضب .. لاخوف .. لايأس ولا أمل

اصبحت الدنيا رخيصة في نظري .. لم اعد استمتع بطعم الطعام الشهي .. ولا بصحبة الأصدقاء .. لم يعد هناك مهم أو تافه .. لم يعد هناك غالي أو رخيص .. لم يعد هناك عزيز أو هين

لقد مات جزء من روحي في محمد محمود

لا اشعر برغبة في الكتابة.

مجلس الوزراء .. والمجلس العسكري .. والمعارك القادمة

2011-12-10T22:26:00.000-08:00

لو حاولنا نعمل كروس ريفرنس بين تصريحات الجنزوري الأخيرة وتصريحات وزير داخليته محمد ابراهيم هانخرج باستنتاج منطقي جداً .. هما ناويين يفضوا اعتصام مجلس الوزرا قريب .. خلال اسبوع على اقصى تقدير

سؤال مهم جداً : بالقوة ولا ودي ؟

رأيي الشخصي .. مش هايستخدموا قوة تاني اطلاقاً في فض اي اعتصامات للأسباب التالية :

المجلس العسكري أدرك انه خسر شعبية ضخمة اثناء أحداث محمد محمود .. وهو ليس على استعداد لخسارة المزيد في الفترة المقبلة بالذات .. بل بالعكس هو في امس الحاجة لمساندة شعبية واسعة قبل بدأ معركة (الشرعية - البرلمان - المجلس الاستشاري - الدستور) القادمة

ومحاولة منه لزيادة رصيده عند الشعب .. سنرى في المستقبل القريب تحسن ملحوظ في الحالة الأمنية والاقتصادية .. ربما نرى الشرطة منتشرة في الشوارع بلا اي مبرر فعلى سوى اشعار المواطن انها "موجودة" .. ربما نرى انفراجة اقتصادية قريبة وعلى رأسها -في رأيي- حل ازمة انابيب البوتاجاز

ملحوظة : الكلام اللي فات دا لا يسري في حالات الغباء المطبق من طرفهم

أما عن المعركة القادمة فهي خاسرة في كل الأحوال بالنسبة للجيش ..

فور بدأ البرلمان عمله سيصبح هو الجهة الوحيدة في البلد ذات الشرعية .. وحتى الجيش نفسه لن يمكنه منافسته في هذا المجال .. ومن الصعب ان افترض ان الجيش لا يدرك هذا لكنه هذا ما يشي به المشهد ..

حتى المجلس الاستشاري المزعوم هو محاولة لاكتساب شرعية زائفة عن طريق استخدام مجموعة من الشخصيات من مختلف الأطياف السياسية والدينية لا خلاف على وطنية معظمهم .. وذلك محاولة منه لنفي تهمة "الانفراد باصدار القرارات" عن نفسه وتحويلها الى "اصدار قرارات بعد موافقة ممثلي الشعب عليها" .. وهنا نقطة الصدام الحقيقية بين المجلس الاستشاري والبرلمان

ستظل هناك حالة من الشد والجزب بين المجلس العسكري والبرلمان حتى بدأ تكوين الجمعية التأسيسية .. وهنا سيكون الصدام الحقيقي الذي سيسلك احدى ثلاث طرق :

1 - البرلمان سيتراجع تحت ضغط المجلس العسكري (غير وارد)

2- سيتم التوصل لصفقة ترضي الطرفين (احتمال ضعيف بما ان ما يريده طرف هو ما لا يريده الطرف الآخر)

3- تراجع المجلس العسكري اما ضغط البرلمان ( وهو في رأيي الاحتمال الأرجح)

البعض يرى أن الليبراليون والقوى "المدنية" داخل البرلمان على استعداد للموافقة على تدخل الجيش في وضع الدستور منعاً لأنفراد القوى الاسلامية بوضعه .. وهو احتمال قائم بالفعل .. وان حدث فسيزيد من عنف الاحتكاك بين القوى الاسلامية والمجلس العسكري .. بل ربما يتطور الأمر الى المواجهة المباشر كالتظاهر والاعتصام بأعداد ضخمة

معركتنا القادمة ليست مع مجلس الوزراء .. ومن يرى ذلك فهو ضيق الأفق .. بل لا أكون مبالغاً اذا ادعيت ان المجلس العسكري سعيد بانشغالنا بمجلس الوزراء عن الصورة الأكبر

يتبع عند اللزوم.

مشهد في محمد محمود ..

2011-12-07T05:35:00.000-08:00

رأيت في محمد محمود المشاهد كثيرة .. ما بين طوب وغاز وخرطوش .. وجرحى ومختنقين وقتلى .. مصورين يلتقطون الصور بحماس وشباب يحتمي بالاشجار والسيارات .. أقنعة غاز وكوفيات مربوطة على الوجة .. مابين بخاخات مملوئة بمضادات الحموضة وسوائل ملحية وخميرة مذابة في ماء .. والموتوسيكلات التي تنقل المصابين الى المستشفيات الميدانية وسيارات الاسعاف تولول ذهاباً الى عمق الشارع واياباً الى العيادات المتنقلة .. ومابين الهواء الملبد برائحة الغاز المسيل للدموع المميزة الشبيهة برائحة الكبريت .. استوقفني مشهد محدد ..

في الخطوط الأمامية .. وبالتحديد في أول خط مواجهة .. يقف شاب في منتصف الشارع المظلم تماماً وقد ولى ظهره لتشكيلات الأمن المركزي الواضحة على مرمى البصر .. يمسك في يده دلو مملوء بالماء ويقف في صمت وسكون لا يعبأ بأصوات اطلاق الخرطوش والقنابل التي تصم الآذان من حوله .. حتى اذا رأى قنبلة غاز تسقط قريبة منه .. انطلق كالبرق يجري نحوها فيلتقطها ويغمسها بطول ذراعه في دلو الماء حتى يخمد دخانها تماماً فيلقيها بعيداً ويعود الى حيث كان يقف سابقاً في انتظار القنبلة التالية ..

ظللت في مكاني خلف شجرة عريضة اراقبه لمدة تفوق الخمس عشرة دقيقة وهو يقوم بهذة العملية مراراً بسرعة ومهارة وجرأة يحسد عليها

تمنيت ساعتها لو اني املك نصف شجاعته .. فحينما كان الناس يقذفون حجر أو حجرين ثم يهرعون للاحتماء بأقرب ساتر .. كان يقف هو بلا سواتر على الاطلاق في هدوء مثير .. كان يبدو كمن انفصل عن العالم بأكمله وانصب كل تركيزه على اصطياد القنبلة التالية

من هنا تداخلت المشاهد ولا أتذكر تفصيلاً ماذا حدث ..

كل ما اتذكر هو اننا سمعنا صوت خرطوش يطلق .. لا شيء مميز فقد سمعناه مئات المرات في هذة الليلة وحدها .. ولكن المختلف انه فور سماعي لصوت الطلقة انتفض جسد ذلك الشاب بعنف .. ثم سقط على وجهه بلا حراك ..

هرع اليه ثلاثة من قاذفي الطوب فحملوه وأخذوا يبحثون عن موتوسيكل او سيارة اسعاف لنقله اليها .. جريت ورائهم بلهفة فقد كنت اريد ان اعرف ما اصابه لم استطع النظر الى وجهه بوضوح لكنه لم يكن يتألم فافترضت انه قد فقد الوعي .. لكني رأيت ظهره بوضوح وقد تغطى بعشرات الثقوب الصغيرة المحترقة .. ثم عاد الهرج والمرج ليخفيه عن مجال رؤيتي مرة أخرى

لا أعلم ان كان هذا الشاب لا يزال حياً يرزق أم انه قد استشهد كعشرات غيره .. لكن ما استوقفني هو كم البطولات التي قد تكون ولدت وماتت في الميدان دون ان يشهدها احد ..

شعرت انه من واجبي كتابة هذة التدوينة لتوثيق بطولة هذا الشاب الذي لا اعرف اسمه حتى ..

وقود الميدان ..

2011-11-30T19:25:00.000-08:00

من الصعب على الانسان ان يعترف بخطأه .. جزء دفين من الطبيعة البشرية يشعر بالاهانة عند الاعتراف بالخطأ ..

ومع ذلك فأنا أشعر بسعادة أني كنت مخطئ في تقديري لحالة الميدان ..

قلت في التدوينة السابقة أن الميدان قد مات في فبراير ولم يبعث حتى لحظتنا هذه .. فأراد القدر أن يسخر مني .. فإذا بروح الميدان تعود في أحداث 19 نوفمبر

روح الميدان تعود عندما يكون هناك عدو واضح المعالم .. تستطيع ان تنظر اليه في وجهه وأن تقذفه بالحجارة

روح الميدان تتغذى على ارواح الشهداء والمصابين .. فلما توقف نزيف الدم بدأت تذوي وتذبل مرة أخرى ..

لا بأس .. الاعتراف بالخطأ من الشجاعة .. ولكن ..

لا أرى أني كنت مخطئ على طول الخط .. فلازالت القوى السياسية تتناحر على مقاعد البرلمان والميدان هو من يدفع الحساب .. لم يعد الميدان يتصدر عناوين الأخبار وحلت محله أخبار الانتخابات في سائر المحافظات ..

دعونا نعترف أن المجلس العسكري هو المنتصر في هذة الجولة .. فحينما طالبنا برحيل المجلس الفوري اعترض .. ولكنه قدم بديل ارتضاه الغالبية العظمى من الناس وهو الانتخابات .. "حسناً سأرحل ولكن عن طريق تسليم السلطة لبرلمان ورئيس منتخبين" .. ولعل هذا هو السبب الذي يفسر تمسكه بالقيام بالانتخابات في موعدها برغم عدم ملائمة الظروف الأمنية لذلك لا سيما احداث نوفمبر .. فقد رأى أن الانتخابات هي الوسيلة المضمونة لامتصاص البقية الباقية من شرعية مطالب التحرير .. ثم انتهى بنا الحال الى الصورة التي نراها اليوم :

اعتصام هزيل بميدان التحرير يفقد قوته بمرور الوقت .. يشعر كثيراً ممن فيه بالحيرة والارتباك .. فلم تعد المطالب التي ينادون بها واضحة كما كانت .. ولم تعد تجد صدى في نفوس الناس كما هو الحال مع المطالب السابقة .. ولسان حال المجلس يقول "فلتعتصموا كما تشاءون .. الانتخابات تسير على أكمل وجه باعترافكم قبل اعترافنا .. الوزارة الجديدة ستبدأ عملها خلال ايام .. لم يعد وجودكم يسبب لنا ازعاج فهنيئاً لكم الميدان"

شعر الكثير من المعتصمين بمضمون هذة الرسالة .. فتعالت اصوات تنادي بفض الاعتصام ، ليس من باب اليأس ولكن من باب الانسحاب التكتيكي

رأيي أن الاعتصام سيستمر حتى الجمعة القادمة .. إن لم يجدٌ جديد فمصيره الى الانفضاض .. وتلك -في رأيي- هي الخطوة الصحيحة في المرحلة الحالية.

الميدان مات

2011-11-18T18:58:00.000-08:00

تحديث بتاريخ 26/11/2011

ربما كنت مخطئاً في نهاية الأمر .. ليس تماماً ولكن الأمر في حاجة الى تدوينة أخرى

------------------------------------------------------------------------------

بعد يوم طويل في الميدان .. اشعر برغبة عارمة في التقيؤ

الناس عمالة تضحك على نفسها وعلى اللي حواليها وتقول الميدان انهادرة كان زي الفل .. العدد ما شاء الله يفرح والهتافات كانت بترج الدنيا .. حقيقة غير كاملة

الميدان فقد روحه يوم 13 فبراير ولم يستعيدها حتى يومنا هذا .. الميدان مات ..

اذا كنت في الميدان اليوم فانظر حولك .. ماذا ترى ؟

دعني اجيب حتى اذكرك .. رأيت منصة للتيار السلفي التف حولها اتباع التيار ليستمعوا لما يقال دون غيرهم .. اما غيرهم فان اهتمامهم بالمنصة كان من باب الاعتراض على ارتفاع صوت السماعات لدرجة الازعاج خاصة ان المتحدث لا يكف عن الصياح طوال الوقت ..

سؤال بسيط يراودني منذ فترة طويلة ولا جواب حتى الآن .. ما هي مؤهلات عالم الدين لكي يتحدث في السياسة ؟ .. بأمارة ايه الشيوخ تتكلم في السياسة .. عمرنا شفنا عالم سياسة بيتكلم في الدين ؟!

رد على أحد الأخوة السلفيين بان رسول الله قد كان اعلم البشر بالدين ولكنه كان ايضاً سياسي محنك واستراتيجي لا يشق له غبار ..

ولعل رده يحمل في داخله تفنيد نفسه .. فبمنتهى البساطة لو كان بيننا احداَ كرسول الله اليوم لكان أحرى بنا ان نعينه رئيساً للجمهورية غداَ .. ولكن رسول الله ليس كمثله بشر .. فلا تبحثوا عن رسول الله بيننا اليوم فهو غير موجود .

مشاركة السلفيون في السياسة هي مشاركة شديدة السطحية والسذاجة .. ولا اتوقع لها ان تأتي بنتائج مثمرة.

على بعد بضعة عشرات من الأمتار من المنصة السلفية انتصبت منصة الأخوان المسلمون .. منصة ضخمة منيفة تستطيع ان تراها من اي مكان في الميدان .. يلتف حولها اتباع الجماعة والمتعاطفون معها وبعض الراغبين في فهم منهجهم السياسي

مشكلة الاخوان انهم يرغبون حقاً في الاصلاح .. ولكن الاصلاح كما يرونه هم وليس كما يريده المجتمع ..

واحقاقاً للحق .. فان الاصلاح الذي يريدونه فيه صالح المجتمع والناس .. ويلبي كل مطالب الناس من عدالة وحرية وحياة كريمة .. ولكنه يفترض ان الناس ليسوا على القدر الكافي من الوعي لكي يعرفوا كيف يحققون تلك المطالب ..

هم حقاً ينشدون مصلحة البلد ولكن بمبدأ " أنا عارف مصلحتك اكتر منك"

وهم يرون ان السبيل لذلك هو الوصول الى مقعد السلطة .. فحتى اذا امسكوا بمقاليدها .. استطاعوا ان يحدثوا التغيير الذي يرغبون فيه .. وفي سبيل ذلك فهم يتحملون كم مهول من الانتقاد والتخوين .. فهم لا يشاركون في تظاهرات الا اذا كانت تخدم وصولهم الى السلطة ولا يسمع صوتهم الا اذا ظهر تهديد مباشر لصورة الاصلاح التي يحلمون بتحقيقها .. وعشان كدة يرى الناس ان شعار الأخوان هو "الانتخابات أولاً" بدون النظر الى اية قضايا أخرى مثل محاكمة قتلة الشهداء أو وقف المحاكمات العسكرية للمدنيين .. ولكن الاخوان يرون ان السلطة هي مفتاح حل كل هذة القضايا

وعلى الجانب الآخر فان الاخوان هم أذكى القوى السياسية وأكثرها تنظيماً .. فهم لم يستعدوا المجلس العسكري بشكل مباشر .. بل كانوا يلعبون بأسلوب الجزرة والعصا ..

فكانوا يشاركون في المليونيات ولكن بدون اعتصام .. فهم يرون ان التظاهر جزء من المعادلة .. أما الجزء الآخر فهو طاولة المفاوضات .. وبذلك فهم احتفظوا بسلاح غير مستخدم -منهم على الأقل- حتى الان وهو سلاح الاعتصام .. فعلى سبيل المثال كانوا قد قرروا انهم سيحددون موقفهم من الاعتصام يوم الجمعة 18 نوفمبر في تمام الثامنة مساءاً .. وذلك لأنهم كانوا في مفاوضات طوال اليوم مع المجلس العسكري والحكومة بشأن وثيقة السلمي.وتظل النقطة المحورية هنا .. وهو ان تصرفات الأخوان نابعة من بحثهم عن السلطة ولا تضع اعتبار لما يتفق عليه القوى السياسية والثورية الأخرى.

لن تستطيع ان تجد نقطة تجمع محددة لليبراليين .. فقد انقسموا الى حلقات مناقشة تناثرت في أرجاء الميدان يتحدثون مع بعضهم البعض في سائر القضايا السياسية

مشكلة التيار الليبرالي في مصر انه تيار موجه .. فهو يستمد وجوده بالدرجة الأكبر من خوف الليبراليين من سيطرة التيار الاسلامي المتشدد على الحكم .. وليس بسبب ايمانهم بمبادئ الليبرالية وتعريفها -الا قلة قليلة بطبيعة الحال-

وبالتالي فهو تيار مشتق وليس تيار اصيل ..

وبالرغم سيطرة التيار الليبرالي على وسائل الاعلام -لا أتحدث عن اعلام الدولة بالطبع- فهو لا يمتلك قاعدة جماهيرية تؤهله لمنافسة التيار الاسلامي .. بل بدأ مؤخراً في اكتساب عداوة الناس بسبب شدة تحامله على التيار الديني

أما اليساريين فلم يجدوا لأنفسهم مكاناً بداخل الميدان فقرروا التظاهر في ميدان طلعت حرب ..

في رأيي فان التيار اليساري في مصر هو أنقى التيارات واكثرها احساساً باحتياجات الناس .. فبالنسبة لبعض الناس فان الانضمام للتيار الاسلامي يعني اجتذاب اتباع الدين وبالنسبة للبعض الآخر فان الانضمام للتيار الليبرالي يعني اجتذاب المسيحيين وغير المتدينين .. ولكن التيار اليساري لا يجتذب فصيلاً بعينه ولكنه يجتذب من يشعر حقاً بهموم الفقراء والبسطاء وبالتالي فالانتماء هنا قائم على اقتناع لا عن مصلحة

ولكن المشكلة الحقيقية ان التيار اليساري ليس لامعاً براقاً كبقية التيارات .. فلكل تياراً ما يعد اتباعه به .. التيار الاسلامي يعد بالجنة .. التيار الليبرالي يعد بالحرية .. اما التيار اليساري فليس لديه ما يعد به سوى العدالة الاجتماعية وتكافؤ الفرص وهو ما يعد به كل التيارات على كل حال .. لكنه على الأقل الأصدق من بين كل التيارات الأخرى في وعده

الجانب المشترك بين كل التيارات هو شعورهم بالعداوة تجاه بعضهم البعض .. فالسلفي يرى الليبرالي كافر .. والليبرالي يرى اليساري متخلف .. واليساريين يتشاجرون مع ذباب وجههم ان صح التعبير ..

حالة من الخصام بين سائر القوى والتيارات .. فبالرغم انه في نهاية المطاف كلهم يريدون خير البلد -كما يراه- الا ان الشقاق بينهم يصل الى التكفير احياناً والتخوين احياناً اخرى

كل تيار يخاطب اتباعه فقط ولا يحاول مخاطبة التيار الآخر

فأرجوك لا تقل لي أن الميدان زي الفل .. الميدان ليس زي الفل .. منذ أن قرر كل فصيل أن يبحث عن مصلحته الشخصية والتي يرى فيها بشكل أو بآخر مصلحة البلد والميدان ليس زي الفل

الميدان مات ولن يبعث قريباً .. تخلوا عن حلم المدينة الفاضلة .. افيقوا وكونوا على مستوى الموقف .

كراكيب بجد

2011-11-18T17:26:00.000-08:00

امبارح كان الجمعة 18 نوفمبر المنتظر .. كان يوم كويس في الميدان .. اضفت الى معلوماتي معلومة جديدة : السلفيين ارتكبوا خطيئة لما فكروا يتكلموا في السياسة .. اول مرة افهم فعلاً يعني ايه عالم جاهل .. انا شخصياً لا اعادي السلفيين خالص .. بس انهاردة انا فعلاً كنت هاقتل واحد سلفي .. لسببين : قمة الجهل بالموضوع اللي هو بيناقشه لدرجة اني حسيت اني عايز اخرم وداني بنفسي عشان ماسمعش كلمة زيادة منه .. السبب التاني هو افتقاره لأدنى مستوى من فن الحوار .. اسلوبه هو مزيج من "خدوهم بالصوت لا يغلبوكوا" و "انا صوتي جهوري اذا انا على حق" ..و لو قدرت تقوله اربع كلمات من غير ما يقاطعك تبقى محظوظ ..

الراجل ده فعلاً كان كل ما يفتح بقه كان بيخرج هباب مش كلام

سبحان الله بس اعتقد ان دا كان انسب مثال للرويبضة الذي تحدث عنه الرسول صلى الله عليه وسلم

ولأجل الصدف قابلت واحد اخواني ووقفت اتناقش معاه عن ما يجب ان بكون نظام الحكم عليه .. كان شديد التهذيب في الكلام صوته منخفض الى درجة الهمس مقاطعنيش ولا مرة .. الكلام عنده اخد وعطا .. رأي ورأي آخر

أسوأ ما في الاسلام هو انتماء السلفيين اليه ..

ماكنتش ناوي ان التدوينة كلها تبقى انتقاد في السلفيين .. بس عارف لما يحصل موقف يستفزك لدرجة انك ما تعرف تنام بسببه .. هو كده بالضبط

ممكن ابقى احكي باقي احداث اليوم في تدوينة تانية

اوعي تفتكري اني هاسكت

2011-11-01T19:39:00.000-07:00

قلبي واجعني يا بلدي وايدي مغلولة .. شايفك بتغرقي وبتستنجدي بيا ومش عارف امدلك ايدي

شايفك بتتسرقي وتتحرقي وتضربي وتموتي .. ومش عارف انجدك

يا ريتني كنت بدالك .. يا ريتني مت الف مرة وعشتي انتي لحظة حلوة

اوعي تكوني مش مصدقاني .. اوعي تكوني فاكرة اني بتاع شعارات والسلام ..

ربنا عالم ببحور النار اللي هايجة ومايجة في قلب قلبي .. بحور لو يشاء المولى اني اطلقها على اعاديكي .. تكفي احرقهم كلهم .. وتكفي احرق رمادهم ..

يا بلدي يا غلبانة .. يا مسكينة .. عمر ما حماكي حامي الا وكان حرامي ..

فلوس ايه بس اللي هاتكلم عليها .. دا بيسرق فرحتك .. بيسرق جمالك وعزتك .. بيسرق شبابك .. عايزك تبقي لا ميتة ولا عايشة .. شبح .. يخوف اه بس مايضرش ..

بيضحكوا علينا و بيقولوا بيحموكي .. بيحموكي مننا احنا ؟ .. داحنا انتي وانتي احنا ..

اوعي تصدقيهم لو قالولك اننا عايزين نضرك .. مش مكفيكي امارة كام واحد مات في حبك ؟

كام واحد اضرب واتسجن عشان قال بحبك ؟ .. دول حتى خلوا حبك بقى جريمة ..

لكن اوعي تفتكري اني هاسكت .. لأ ..

انا وراهم والزمن طويل .. لو هما كتير أنا أكتر بأهلك .. لو هما اقويا انا أقوى بحبك .. لو هما معاهم سلاح انا في ايدي عَلمك

انا انتصرت من قبل ما ابدأ المعركة يا بلدي .. انا انتصرت بيكي .. انتصرت بس عشان انتي بلدي

استنيني يا حبيبتي ..

أحمد احب بلده

2011-10-09T04:01:00.000-07:00

"وبعدين يا مدحت ؟" ..

قالها لي وهو يرتشف رشفة من كوب الشاي ثم يسرح ببصره بلا هدف ..

نظرت له نظرة طويلة متفحصاً في تعبيرات وجهه .. ضاقت عيناه في تفكير عميق وتقطب جبينه كما لو كان يحمل هموم الدنيا فوق رأسه ..

- وبعدين في ايه ؟

- في حال البلد .. انا مش مطمن .. المؤشرات كلها بتقول اننا داخلين على طريق مظلم ..

- يابني ليه بس التشاؤم .. ان شاء الله مفيش طريق مظلم ولا حاجة

نظر لي فجأة .. ورد في انفعال حقيقي :

- ياخي انا باحسدك على برود اعصابك .. ماحنا لو فضلنا ساكتين مابنعملش حاجة غير اننا نقول ان شاء الله .. البلد هاترجع اسوأ مما كانت .. لازم نتحرك.

هكذا أحمد دائماً .. دائماً يحمل هم البلد كما لو كانت ابنته الوحيدة .. منذ بدأت الثورة لا أتذكر اني رأيته يضحك من قلبه .. كانت ملامح وجهه تشي بما يشغل تفكيره .. كان يضحك وهو مهموم .. يمزح وهو مهموم ..

- طيب انتا شايف ايه الخطوة المناسبة اللي ممكن نعملها ؟

- احنا كل يوم بنخسر الشارع اكتر .. الناس البسيطة تعبت من عدم الاستقرار وارتفاع الاسعار والانفلات الأمني .. لازم نحاول نكسبهم مرة تانية

لم يكن يتحدث عن مشكلة يعاني منها هو شخصياً .. فهو من عائلة ميسورة الحال على قدر لا بأس به من الثقافة .. مما اضفى على كلامه هالة من المصداقية زادتها الحرارة التي كان يتحدث بها

-انا نفسي تبطل السوداوية اللي انتا فيها دي يابني .. الهم بيقصر العمر.

-يعني لو احنا ماشيلناش هم البلد مين هايشيله ؟

سكتْ للحظة مفكراً ثم استطرد قائلاً :

- احنا نعمل مظاهرات في الأحياء الشعبية .. نفكر الناس ان الثورة قامت عشانهم .. عشان يعرفوا ياكلوا ويأكلوا عيالهم .. عشان يعرفوا يتعلموا ويتعالجوا كويس .. ايه رأيك ؟

- والله فكرة مش بطالة .. نعرضها على بقية الشباب ونشوف ايه رأيهم

- طب يلا بينا نروح التحرير .. هما كلهم يا اما على البستان يا اما على البورصة

-دلوقت ؟ .. يابني دا مشوار طويل أوي .. وبعدين ممكن على بال ما نوصل يكونوا مشيوا

- يابني يلا بس .. ان شاء الله نلحقهم

دائماً متحمس .. دائماً مهموم بالبلد ..

اذا ما اتفقنا على حضور مظاهرة كان هو أول من يصل .. من النادر جداً ان تتصل به لتسأله عن مكانه فلا يجيبك بجملته العتيدة : "أنا في التحرير"

لم يكن أحمد يعلم ان مكافأة اخلاصه لبلده وحبه الشديد لها هو المحاكمة العسكرية ..

أحمد علي امين المنشاوي .. اعتقل يوم الجمعة 30/9 امام وزارة الدفاع واحيل للمحاكمة العسكرية بتهمة لم يرتكبها اصلاً ..

أحمد احب بلده .. فهددوه يتدمير مستقبله ..

أحمد علي مهندس طيران وليس بلطجي

الحرية لأحمد علي ولكل المحاكمين عسكرياً

ليه المحاكمة عسكرية ؟

2011-10-07T05:12:00.000-07:00

الجمعة 30 سبتمبر 2011

كنت في ميدان التحرير عقب صلاة الجمعة مباشرة ، الجو شديد الحرارة ولا أثر لسحابة في السماء ..

العدد ليس كبير كما كنت اتوقعه ، لا بأس البركة فيمن حضر

كلمت عبد الرحمن الذي كان قد حضر من الاسكندرية خصيصاً للمشاركة في المظاهرة :

أنا : ايه يا بيدو عامل ايه .. انتا فين كدة ؟

هو : انا مع خالد .. انتا واقف فين ؟

أنا : انا واقف عند اشارة قصر النيل .. قابلوني هناك.

هو : احنا هناك فعلاً بس مش شايفينك .. استنى خلاص شفت قفاك.

بعد تبادل التحية انهمك عبدالرحمن في التقاط الصور هنا وهناك ، وتبادلنا انا وخالد آخر الأخبار والآراء السياسية :

أنا : امال فين أحمد علي ؟

هو : لسه مجاش بس زمانه في السكة

أنا : غريبة .. أول مرة نيجي قبله .. أحمد بيبقى بايت في الميدان من اليوم اللي قبله اصلاً

هو : أصل عنده دور برد جامد قوي .. قلتله مايجيش ويريح انهاردة بس هو مارضيش

أنا : الكاب اللي انتا لابسه دا شكله عبيط فشخ

هو : ليه يابني دا اديداس اصلي والله

أنا : مش عارف حاسس كدة انه مخلي شكلك عبيط

هو : أولاً الدنيا شمس .. ثانياً انا حالق قصير قوي و من ساعة الطوبة بتاعت الأمن المركزي اياها ما علمت في راسي وهي سايبة ندبة شكلها وحش .. فمش ناوي اقلعه

أنا : مش ملاحظ ان العدد انهاردة قليل ؟

هو : الناس بدأت تتعب وتكسل .. والمجلس ادى للأحزاب قرشين وراحوا لحالهم .. مش متبقي غيرنا .. بس مش مهم طول ما شغلنا الشاغل هو مصلحة البلد ربنا هايكرمنا ان شاء الله .. اهم حاجة ما نستسلمش لليأس.

نظرت له نظرة تعجب مخلوطة بالاعجاب .. لطالما كان خالد هو مصدر التفاؤل في الشلة .. كان موهوباً في خلط الجد بالهزل ليهون علينا مرارة الواقع .. كان يرى دائماً ان الأفضل قادم غداّ وليس الان ..

أنا : فين الشال بتاعي صحيح .. مش قلتلي لما تروح غزة هاتجيبلي شال من هناك

هو : والله ما كان في وقت انزل خالص .. كنا مشغولين جداً من ساعة ما وصلنا لحد ما مشينا .. بس وعد المرة الجاية هاجيبهولك معايا

أنا : كنتوا موديين ايه في القافلة المرة دي ؟

هو : عشرة طن اسمنت بس .. حاجة رمزية يعني.

طلبت منهم مساعدة في توزيع ملصقات "لا للمحاكمات العسكرية" .. وما ان انتهينا حتى ذهبنا لمقابلة أحمد العاصي صديق خالد ثم ذهبنا جميعاً الى هارديز للغداء ..

أنا : انا ماشي بقى يا شباب عشان انا من الصبح واقف في الشمس وحاسس ان جالي ضربة شمس .. لما ييجي احمد علي سلمولي عليه

خالد : ما تستنى دا فيه مسيرة طالعة وزارة الدفاع كمان شوية

أنا : عندي صداع فشيخ ، بس لو طولتوا ممكن اناملي ساعتين واحصلكوا .. المهم خلي بالكوا على نفسكوا وخلي بالكوا من بعض

خالد : ان شاء الله ربنا يستر

كان هذا آخر حوار دار بيني وبين خالد صلاح .. وفي نفس اليوم اعتُقل خالد وأحمد على وتم احالتهم الى محاكمة عسكرية بتهم مشتقة من البلطجة بشكل أو بآخر ..

أحمد وخالد ليسوا بلطجية .. ولم يتظاهروا من أجل مطالب شخصية .. هم ليسوا في حاجة اصلاً الى التظاهر .. خالد يعمل في احدى كبرى شركات الالكترونيات في العالم .. وأحمد من عائلة ميسورة الحال

أحمد وخالد خرجوا ليطلبوا حق كل مصري في حياة كريمة ، وليطلبوا حق البلد في مستقبل أفضل

كانت هذة آخر صورة وضعها خالد على صفحته الشخصية قبل القبض عليه

الحرية لأحمد وخالد ولكل من هو مثلهم من المعتقلين .

فضفضة

2011-09-10T14:54:00.000-07:00

مدونتي العزيزة ..

اكتب اليوم اليك بعد توقف طويل .. أكتب فقط لأني شعرت برغبة في الكتابة .. هذة المرة لا تحليلات سياسية ولا آراء متفذلكة .. فقط فضفضة .. لن احاول التنميق والتنسيق .. سأكتب كما تتداعي الي الكلمات ..

أشعر بتخمة في عقلي من شدة ازدحامه بالأفكار والأحاسيس .. اشعر بنوع جديد من الاحباط لم اشعر به من قبل

ربما بسبب بطء سير الأمور .. ربما لأني آمل حدوث اشياء لا تحدث ابداً ..

لا اخفي عليك خبراً .. ثقتي في نوايا المجلس العسكري اهتزت بعنف .. تصرفات غير مفهومة وقرارات متخبطة ثم صمت حينا يجب الكلام وكلام حينما يجب الصمت ..

لا اخفي عليك انني فقدت آثر الـ pattern الذي كان يسير عليه المجلس وبالتالي فقدت القدرة على تفسير تحركاته والتنبؤ بتحركاته المستقبلية .. لعل ذلك احد اسباب شعوري بالاحباط .. لم اتعود هذا الشعور السخيف بالحيرة

لم اعد استطيع استشفاف نوايا المجلس تجاه السلطة أو الثورة

يمكن دوماً فرض سوء النية أو حسن النية في اي شيء ..

ولكن للطبيعة البشرية دورها العتيد .. فمجرد تخيل سيناريو سوء النية يضيف الى صدري اطنان من الاحباط لا قبل لبشر بتحملها ..

ومع ذلك لا اجد مفراً من محاولة تخيله ..

اجد نفسي تلقائياً اقول : يا غلبك يا مصر .. مش مكتوبلك تتهني يومين على بعض

اتوجه الى السماء واقول : يا رب .. الناس دي تعبت كتير ونفسها تفرح شوية .. يا رب الشعب دا والله غلبان ومالوش غيرك .. يا رب ماتكسفوش يا رب .. يا رب دا شعب شاف المر اشكال والوان .. آذن له انه يفرح ويعيش حياة كريمة يا رب .. يا رب الهمنا الصواب يا رب .. قُد خطواتنا الى ما فيه خير للبلد .. يا رب .

ثم اتذكر وعد كنت قد قطعته على نفسي يوم 28 يناير .. اما ان اعيش في بلدي التي احلم بها .. أو اموت على سقالة بنائها ..

اتخيل عدد الاشخاص الذين يفكرون مثلما افكر .. لابد انهم كثر .. مصر تستاهل تتحب اصلها .

اشعر بالحماس يملأني مرة أخرى .. لا وقت للاحباط .. كيف استطيع المساهمة بشكل مفيد ؟

انظر حولي .. لابد دائماً من شيء يحتاج الى الاصلاح .. بداية لا بأس بها ..

مدونتي العزيزة .. أراكي تتثائبين مللاً من كلامي غير المرتب .. ارجو الا اكون قد اطلت عليكي ..

مستعد تدفع كام ؟

2011-08-23T05:23:00.000-07:00

الموضوع ليس في كون الثورة الليبية ثورة مكتملة بينما ثورتنا المصرية منقوصة أو شيء من هذا القبيل ..

تعالى نبص من كذا زاوية ونقيم الموضوع بشكل عملي الى حداً ما ..

أولاً : الاستعداد

احنا لما طولنا على الناس شوية في اعتصام التحرير كانوا بيدعوا علينا وبيقولوا الله يخرب بيوتكوا خربتوا البلد !! .. تخيل احنا خربنا البلد باعتصام .. فما بالك لو السيناريو كان اشبه ولو قليلاً بليبيا ..

كنت بتناقش مع أحد اصدقائي في اسباب تمسك الليبين بثورتهم على الرغم من كم الصعوبات اللي واجهتهم .. فكان رأيه أنه طول 40 سنة هي مدة حكم القذافي ليبيا كانت بترجع بضهرها .. فبالمقارنة بمصر ليبيا تعتبر - مستخدماً هذا اللفظ تحديداً - primitive اي بدائية.

النقطة الثالثة والأكثر خطورة هي أن الشعب المصري بطبعه رقيق القلب .. لم يكن ليتحمل مناظر الجثث والأشلاء والدماء والتي كنا نراها في المشهد الليبي كل ساعة .. وكان أول خاطر سيرد على ذهنه أن "ليت ما قامت ثورة" .. سيقولها صدقاً وهو مؤمن بها وسيتحول الثوار بحق الى قلة مندسة ترغب في هدم البلاد وتمكين اسرائيل وامريكا وايران وحزب الله والماسونية والكابالية من مصر !

ثانياً : الثمن

لاجدال على ان ليبيا قد دفعت ثمناً باهظاً اثناء احداث ثورتها .. ثمناً ستظل تسدده لأجيال قادمة ، ما بين انهيار للبنية الأساسية في كثير من المدن والدمار المطبق الذي لحق بجيشها ما بين انشقاق أو هجمات الثوار والناتو .. فإذا كانت البورصة المصرية قد اهتزت بعنف جراء الثورة المصرية على شكلها هذا .. لك ان تتخيل حجم الدمار الذي لحق بالاقتصاد الليبي ..

البعض قد يرى كلامي هذا غير عملي بحجة أن الاقتصاد الليبي قائم على تصدير البترول .. وهذة ليست المشكلة .. المشكلة انه طيلة 40 تفنن فيها القذافي في كيفية اهدار ثروات ليبيا الطبيعية لم يستطع ان يقيم منظومة اقتصادية صحيحة .. حتى ولو كانت قائمة على تصدير البترول فقط .. كان فاشلاً بكل ما تحمل الكلمة من معاني

النقطة الثالثة هي كم القتلى والشهداء .. كم كنا مستعدون أن نفقد في سبيل نجاح الثورة ؟ .. فلنبتعد أولاً عن الردود غير العملية من قبيل "حتى آخر شاب مصري" .. أنا لا أشكك في نية أحد أو في استعداده النفسي للقتال حتى آخر نفس في صدره في سبيل أن يرى حلمه يتحقق .. ولكني هنا أنظر الى ما يفرضه عليه واقع الأمور من معوقات ..

كما قلت من قبل الشعب المصري رقيق القلب .. فما بين مشاهدته لخيرة شبابه وهو يقضي برصاص قواته المسلحة وما بين سموم الاعلام التابع للنظام .. كنا سنجد 90% من الشعب يسبحون بحمد مبارك بعد شهر واحد من المذابح

ربما شاء القدر أن يجنبنا هذة الأثمان الباهظة في مقابل بعض المفاوضات السياسية .. ولكن لا يستطيع أحد ان يدعي ان البلاد كانت ستقبل دفعها ..

ثالثاً : مميزات الثورة المصرية

لن أكتب هنا شيئاً محدداً .. سأترك هذا الجزء لك لتعدد فيه ما تراه من مميزات .. انظر الى الثورة الليبية وقارن .. وكن أميناً مع نفسك في المقارنة.

والخلاصة أنه ربما نجح النموذج الليبي في ليبيا .. ولكنه كان سيفشل فشلا ذريعاً في مصر .

عن احداث سيناء نتحدث ..

2011-08-18T18:48:00.000-07:00

الجمعة 19/8/2011 .. في تمام الثالثة وخمسة عشر دقيقة صباحاً بدأت كتابة هذا المقال ..

اضطرابات في سيناء .. قتلي في صفوف الجيش المصري برصاص الجيش الاسرائيلي والعكس .. حديث عن جماعات مسلحة وحديث عن اختراق للمجال الجوي المصري من قبل الطائرات الاسرائيلية .. حديث عن عمليات عسكرية اسرائيلية في سيناء وحديث عن رد رادع من الجيش المصري .. حديث عن حرب وشيكة وحديث عن تمثيلية شارك في صنعها المجلس العسكري والحكومة الاسرائيلية لصرف انتباه الناس عن مطالب الثورة وتدعيم الحكم العسكري بمصر ..

لا أحد يعرف اين الحقيقة .. ومحاولة ايجادها ليست موضوع هذا المقال ..

كل ما في الأمر هو اني طرحت على نفسي بعض الأسئلة وشعرت بفيض من المشاعر المتداخلة التي شعرت بأهمية تفريغها في هذا المقال .. لعلي احتاج ان اتذكرها في يوم ما ..

ماذا لو نشبت حرب بيننا وبين اسرائيل ؟

فور ورود هذا السؤال الي ذهني شعرت بسعادة وحماس غير مبررين .. كما لو كنت اتوق الى حدوثها ..

انا لست شخص دموي بطبعي .. ولست متأكد من انتصارنا في هذة الحرب .. وبالرغم من ذلك فأنا اتمنى ان استيقظ ذات يوم لأجد مصر قد اعلنت الحرب على اسرائيل ؟

تسأل لماذا ؟

ربما لأني سئمت السلبية في كل المواقف المصرية من جهة .. وسئمت الغطرسة والغرور الاسرائيلي / الأمريكي من جهة أخرى

سئمت مشاهد القتلى والجرحى الفلسطينيين شبه اليومية .. وسئمت لا مبالاة اسرائيل بمن تقتل ..

سئمت الشعور المسيطر على اغلبية الشعب المصري بأن امريكا هي سيدة العالم .. وأن ما تشاءه يكون

سئمت الشعور الدائم بوجود مؤامرة غربية على مصر .. وانه ما من شيء يحدث الا ووراءه مؤامرة تهدف الى اضعاف مصر والعرب من وراءها ..

سئمت الصاق تهمة الارهاب بكل ما هو عربي ومسلم .. سئمت سوء معاملة الغرب للعرب باعتبارهم ارهابيين وهمج حتى يثبت العكس

سئمت كل هذا حتى سئمت السأم نفسه ..

هل سأتطوع في الجيش اذا قامت الحرب المذكورة ؟

نعم .. لأني ببساطة لم أستطع التفكير في ميتة أفضل من الموت في مواجهة الجيش الاسرائيلي ..

قد أموت .. لكني لن اموت الا وقد قتلت ثلاثة منهم ..

قد تكون حرباً خاسرة .. ولكنهم لن ينتصروا !

لن ينتصروا الا بانكسارنا .. ونحن لا ننكسر

قد أموت .. ولكني سأموت مرفوع الرأس ولتمت انت غيظاً .. سأموت مبتسم ولتمت انت كمداً ..

سأموت .. ولكنك لن تنتصر.

كيف انتصر المجلس العسكري في العباسية ..

2011-07-27T04:27:00.000-07:00

من بداية الثورة والمصريين بشكل عام مقسومين اليى قسمين .. قسم مشارك في الثورة بالتأييد وقسم -مؤيد أو معارض- صامت .. لن أتحدث عن القسم المشارك المعارض لأنهم اما مأجورين أو معتوهين ..

كنا بنفرح أوي واحنا ماشيين في مظاهرة لما نلاقي حد بيحدفلنا من البلكونات مية او بسكويت .. كنا بنحس ان الناس بتشجعنا وبتأيدنا .. صحيح كنا بنهتف وبنتمنى انهم ينزلوا ينضموا لينا .. لكن اضعف الايمان الدعم المعنوي ..

المشكلة اننا كان عندنا قناعة داخلية -وبدون اتفاق مسبق- أن من لم يشارك في الثورة منذ يوم 28 يناير وحتى التنحي لن يشارك فيها بأي صورة بعد هذا التاريخ .. وأن الأغلبية الصامتة ستظل صامتة مهما حدث .. قد تكون مؤيدة للثوار أو معارضة لهم لكنها في كلتا الحالتين صامتة ..

ثم فوجئنا كلنا بانهيار هذة النظرية في احداث العباسية 23/7/2011

نجح المجلس العسكري في تحريك جزء من الأغلبية الصامتة ضد الثوار فدارت معركة شرسة اصيب فيها المئات ..

لكن خطورة هذة المعركة تتعدى تعداد المصابين .. فهذة هي المرة الأولى التي تتحرك فيها الأغلبية الصامتة بالتأييد أو بالمعارضة ..

وفي ذلك اشارة خطر واضحة لم ينتبه اليها كثير من الثوار ..

ان خطاب المجلس العسكري الاعلامي يتسلل الي عقول الناس شيئاً فشيئ .. ومع مرور الوقت سيزداد حجم الكتلة المعارضة .. وسيفقد الثوار شرعية تحركاتهم .. ستفقد الاعتصامات شرعيتها .. وستفقد المظاهرات والمسيرات شرعيتها .. ثم -في أسوأ الفروض- سنتحول الى فصيل خارج على القانون يمارس البلطجة -!- وتعطيل مصالح الناس ..

المجلس استغل تقصير فادح من طرفنا ولعب عليه بشطارة ..

اهالي العباسية كنوا بداية .. من التالي .. والى متى ؟ .. الله اعلم

اذا لم نتحرك سريعاً لاستعادة ثقة الناس وتعاطفهم مع مطالبنا .. فلا نلومن الا انفسنا.

كان عندي حلم ..

2011-07-24T16:41:00.000-07:00

أنا عمري في حياتي ما نزلت مظاهرات قبل يوم 26 يناير .. وعشان كدة كنت مستغرب جداً أني نزلت بدون لحظة تردد أو تفكير فيما اذا كان نزولي ده خطوة صحيحة ولا خاطئه ..

أنا نزلت لأني كان عندي حلم ..

كنت بحلم ان بلدي في يوم من الأيام تبقى أعظم وأعدل وأقوى دولة في العالم .. كنت بحلم أن بلدي مايبقاش فيها حد جعان أو عيان أو نايم في الشارع .. كنت بحلم أن كل واحد في بلدي يبقى حاسس أن بلده بتحافظله على كرامته جوه وبره ..

كنت بحلم أن التكنولوجيا تبدأ من عندنا وييجي العالم ياخدها منا .. أن ما يعتبره العالم رفاهيات يكون هو أسلوب حياتنا .. أن الناس تيجي من كل مكان في الدنيا عشان تتعالج عندنا أو تتعلم في جامعاتنا .. ويبقى الواحد فيهم فخور أوي ومنفوخ على اقرانه وهو بيقول "أنا خريج جامعة القاهرة أو عين شمس أو ... "

كنت بحلم أن المصري في كل بلاد الدنيا يتعمله ألف حساب .. محدش يقدر يدوسله على طرف لمجرد انه مصري .. أن يتسابق الناس لخدمته لمجرد انه مصري ..

أن ينظر العالم كله بعين الانبهار والغيرة لبلدي .. أن ينتظر موقفها ليحدد موقفه .. أن يرتعد لغضبها ويطلب رضاها .. أن يلجأ اليها طلباً للمشورة .. و يحتكم اليها فضاً للنزاعات .. أن تسير فيتبعها العالم ..

كنت بحلم أن يرتكز اقتصاد العالم على اقتصاد بلادي .. أن نزرع ونصنع ونخترع ونستحدث ونستبق ونطور ونصلح .. أن نقدم المعونات لمن يحتاجها .. أن يتمني الناس الهجرة إلى بلادي أو العثور على فرصة عمل بها ..

كنت بحلم أن يذكر التاريخ لبلدي وقوفها في جانب الحق .. وردعها للمتجبر .. وحنوها على المستضعف ..

كنت بحلم .. ولا أزال .

شهادتي لما حدث في موقعة العباسية 23/7/2011

2011-07-24T04:32:00.000-07:00

كانت الساعة حوالي السادسة وخمس دقائق عندما وصلت الى الشارع المؤدي الى مسجد النور بصحبة صديقي عبد الرحمن وصديقه أحمد .. لما قربنا من الجامع لقينا الناس مقسومة نصين وبتحدف طوب وزجاج على بعض .. مكناش عارفين فين البلطجية وفين المتظاهرين .. كنا احياناً بنتراجع في عكس اتجاه مسجد النور واحيانا نضغط في اتجاهه .. لما الدنيا هديت شوية قلنا نقرب شوية عشان نشوف ايه اللي بيحصل عند الجامع .. بعديها بحوالي 10 دقائق لقينا الطوب اشتغل تاني واحنا ساعتها كنا تقريباً في وسط المسافة ما بين الطرفين .. انا وعبد الرحمن جرينا ناحية الجامع وأحمد جري العكس .. افترقنا عن أحمد ومشوفناهوش تاني الا لما رجعنا الميدان .. فضلنا انا وعبد الرحمن مع بعض معظم الوقت ومكناش بنفترق الا للحظات ونتقابل تاني ..

* معركة الطوب والمولوتوف

بدأت المعركة حوالي الساعة 7:00 وفضلت شغالة لحد بعد ما الأمن المركزي وصل بشوية ..

احنا كنا واقفين ضهرنا للجامع وعلى شمالنا كان في شارع جانبي كانت بتحصل فيه معارك جانبية بين المتظاهرين والبلطجية والمعركة الرئيسية كانت بتدور في شارع جامع النور .. كنا بنحاول نضغط لقدام على قد ما نقدر عشان نحمي الجامع والبنات اللي معانا اللي كانوا قاعدين عند الجامع .. نحميهم من الطوب وكسر الزجاج والكلام دا كله

كانت معركة عنيفة بين الطرفين .. شفناهم بيستخدموا متاريس وصناديق مياة غازية عشان يحموا نفسهم من وابل الطوب .. اضطرينا نكسر بلاط الرصيف عشان نقدر ندافع عن نفسنا .. بعض من البلطجية طلعوا فوق اسطح العمارات اللي على الشمال وانتا مدي ضهرك للجامع وحدفوا علينا قوالب طوب من فوق السطح .. من وقت للتاني كانوا بيحدفوا علينا مولوتوف من الشارع الجانبي اللي على الشمال أو من الجنينة اللي على اليمين .. ماكناش شايفين بالضبط فين مصدر المولوتوف .. احياناً كان بيبقى في صوت انفجارات قوية من ناحيتهم بس ماقدرتش احدد بالضبط اذا كانت دي طلقات صوت أو طلقات حية .. واحدة من قنابل المولوتوف وقعت وسط تجمع من المتظاهرين والنار مسكت في رجل واحد منهم .. قنبلة تانية وقعت على عربية بيجو كانت راكنة والنيران التهمتها عن آخرها .. بذلنا كل جهدنا عشان نطفيها قبل ما تنفجر ..

أعداد الاصابات كانت كبيرة ومتنوعة بداية من كدمات في الرجل والبطن والظهر وحتى جروح قطعية في الرأس والوجه إلى جانب الكسور بمختلف انواعها

في اثناء المعركة كان الشيخ حسنين النجار بيخاطب المتظاهرين والجيش من خلال مكبرات صوت مسجد النور .. كان بيناشد المتظاهرين العودة الى ميدان التحرير حقناً للدماء .. كان بيناشد الجيش التدخل لحماية المتظاهرين .. كان صوته متأثراً ومؤثراً بشدة حتى أنه كان يبكي بشدة أثناء دعاءه .. تأثر الكثير من المتظاهرين بدعاءه فتركوا المعركة وأخذوا يؤمنون على دعاءه .. أتذكر اني كنت أبكى بشدة حينما كان يقول بصوت متهدج ( الشعب يقتل بعضه .. الشعب يقتل بعضه .. يا أهل مصر لا تتركوا شيطان الفتنة يعميكم .. يا أهل مصر احقنوا الدماء .. يا جيش مصر احمي اهلها من الفتنة .. يا جيش مصر احمي العزل المسالمين .. اللهم عليك بالحاكم الفاسد .. اللهم عليك بالحاكم الفاسد .. اللهم عليك بكل من اراد لمصر سوءاً .. اللهم اجعل كيدهم في نحورهم .. اللهم نجي مصر .. اللهم نجي مصر .. اللهم نجي مصر .. اللهم انصر اهل مصر على شياطينهم .. اللهم جمعنا ولا تفرقنا .. اللهم اقبضنا اليك غير مفتونين .. اللهم تقبل شهداءنا ........ )

ثم بدأ بقراءة القرآن بصوت حزين مدو كان يجلجل في المنطقة بأسرها ..

* انسحاب البلطجية ووصول الأمن المركزي

وصل الأمن المركزي حوالي التاسعة مساءاً وبدأ في نصب التشكيلات أمام صفوف البلطجية ..البلطجية فضلوا يحدفوا الطوب باتجاه المتظاهرين من أمام ومن خلف الأمن المركزي وهو كان واقف مابيعملش اي حاجة تجاه الطرفين .. شوية والمتظاهرين ضغطوا باتجاه الأمن المركزي والبلطجية فالأمن المركزي فتح طريق على أقصى اليمين عشان المتظاهرين يعدوا ناحية البلطجية وفضل واقف على الحياد .. بعد 10 دقائق تقريباً البلطجية اختفوا تماماً وتبقى الجيش ناحية مسجد النور والأمن المركزي في الناحية العكسية .. والمتظاهرين في المنتصف ..

مزيج من كراهية المتظاهرين للأمن المركزي وموقفه السلبي تجاه البلطجية اللي كانوا واقفين في وسطه وبيحدفوا علينا طوب .. دفع المتظاهرين الى اخراج غضبهم وغلهم على جنود الأمن المركزي أنفسهم عن طريق سيل من الطوب والحجارة انهمر عليهم حتى ان صوت ارتطام الحجارة بدروعهم كان أشبه بصوت المدافع الرشاشة .. ظل الوابل مستمر لمدة عشر دقائق اخرى حتى خرج جنديين من وسط الدروع يحملون مدافع قنابل مسيلة للدموع .. فأطلقوا 5 قنابل بشكل متقطع باتجاه المتظاهرين .. مما دفعهم للتراجع باتجاه المسجد .. لم يكن المتظاهرين مستعدون للتعامل مع القنابل المسيلة مما أدى الى سقوط الكثير من حالات الاختناق ..

مع بدء اطلاق القنابل افترقنا انا وعبد الرحمن وماكناش عارفين ندور على بعض لأننا كنا بنفتح عنينا وبنتنفس بصعوبة .. انا كنت عارف انه كان واقف في الصفوف الأمامية .. فكتمت نفسي ودخلت ادور عليه مالقيتوش .. نفسي ضاق بشدة فاضطريت آخد نفس وانا واقف وسط الغاز .. حسيت بسكاكين من نار بتقطع في صدري وحسيت بدوار عنيف .. جريت ناحية الجامع بس مقدرتش اكمل فوقعت على الأرض وانا حاسس باختناق شديد وزغللة في عيني .. نزلت على ركبي لقيت اتنين جم شالوني قصاد بعض ورجعوني ورا عند عربيات الاسعاف .. لقيت حد بيرش حاجة في بقي وعيني .. حسيت بتحسن خفيف والنتفس بقى اسهل .. قمت أدور على عبد الرحمن تاني .. قدمت بعد بوابة المسجد بشوية لقيته راجع من قدام وعينيه حمرا جداً وغرقانة دموع ..

*موقف الجيش

ولا اي حاجة .. من الأول للآخر الجيش كان واقف بيتفرج .. لم يتدخل الا ببعض اطلاق النار في الهواء واللي كان عامل زي بمب العيد .. محدش كان بيخاف ولا حتى بيبص ناحيته .. مفكرش يحمي المتظاهرين من البلطجية .. مما اعاد للأذهان ذكريات موقعة الجمل ..

*موقف الأمن المركزي

كان -ياللعجب- واقف يتفرج .. محاولش يتدخل برضه لصالح اي طرف .. لكن احقاقاً للحق هو مضربش قنابل الا لما استحمى طوب

حوالي الساعة عشرة اتحركت أنا وعبد الرحمن وقررنا نرجع الميدان .. انضمينا لمجموعة صغيرة من الشباب ومشينا نهتف في الشارع .. ركبنا المترو وفضلنا نهتف جوة العربية .. نزلنا نهتف في المحطة .. وطلعنا نلف في ميدان التحرير واحنا بنهتف

انتهت الشهادة

شهادة الشيخ حسنين

نقطة على هامش الموضوع .. أنا عمري ما تخيلت في حياتي ان الغباء يصل بالمجلس لأن يصدروا بيان يتهموا فيه 6 ابريل بالعمالة .

فوائد خطاب اللواء الفنجري

2011-07-14T07:55:00.000-07:00

دعونا نعترف ان الثورة كانت قد حادت بالفعل عن مسارها ..

صحيح اننا بذلنا في الستة أشهر الماضية جهد خرافي لردها لمسارها الأصلي .. كنا ننجح في بعض الأحيان ولكن لكما غفلنا أو انشغلنا بأمور جانبية .. انحرف مسارها بعض الشيء ..

لن أدخل في تفاصيل ولكن يمكن القول أن ما قامت الثورة لهدمه مازال قائماً .. وأن ما قامت الثورة لبناءه لم نبدأ في بناءه بعد ..

ثم يأتي يوم 8 يوليو .. الذي ان دل على شيء فعلى أنها ثورة أراد لها الله أن تنجح فلا يهم اي شيء آخر .. ولعلك قد لاحظت بعض المشاهد أثناء الثورة وحدثت نفسك قائلاً : سبحان الله .. داحنا لو ماكناش عملنا التصرف الفلاني ماكنتش الثورة نجحت .. أو : لو ماكانوش هما عملوا الحركة الفلانية كان زمانهم هما المنتصرين ..

مقتنع تمام الاقتناع أن الثورة تتحرك بيد الله .. وبما ان الله لا يريد لنا الا الخير .. فلا راد لنجاحها مهما كان ..

وأحدث مثال على الكلام ده ما حدث بين 8 الى 13 يوليو .. الثوار عادوا للاعتصام .. وقد كان امراً مطلوباً بعد ما اتأكدنا ان المجلس مابيمشيش غير بالشلاليت .. ثم بدأ التفكير في خطوات تصعيدية ، ومن هنا بدأت الثورة تحيد عن مسارها الأصلي مرة أخرى .. مروراً بغلق المجمع وقطع الكورنيش وحتى التفكير في قطع الممر الملاحي لقناة السويس - ! - وغلق البورصة ..

وكأنما غمامة قد نزلت على عيون المتظاهرين فمنعتهم من التمييز بين التظاهر السلمي وبين البلطجة .. فغلق مجمع التحرير بالقوة هو البلطجة بالتعريف .. وقطع الممر الملاحي لقناة السويس هو الأرهاب بالتعريف ..

ولأن الله كان قد أراد بالفعل للثورة أن تنجح .. فقد خرج علينا المجلس بخطاب اللواء محسن الفنجري .. والذي لم يكن لتأثيره علاقة بمحتواه أو حتى بالغرض الأصلي من اذاعته ..

* نظرة تحليلية للخطاب

خرج اللواء الفنجري بخطاب شديد اللهجة .. يحمل الكثير من الانذار والوعيد قائلاً أنه لن يسمح لأحد بالقفز على السلطة -في اشارة الى هتافات المتظاهرين بسقوط المشير والمجلس- .. وأن بعض التظاهرات قد انحرفت عن المسار السلمي -في اشارة ألى غلق المجمع وقطع الطرق- وأن الجيش لن يسمح باستمرار مثل هذة الأفعال التي تضر بمصالح البلاد العليا .. نص الخطاب

أنا واثق أن ما ترتب على هذا الخطاب هو الهام مباشر من الله لجميع الأطراف ..

فقد تنبه المعتصمون لحقيقة ما يفعلون .. وأدركوا أنهم لن يجنوا شيئاً من غلق المجمع سوى استعداء من ستتعطل مصالحهم جراء ذلك ..

وأدركوا أن أحد الأسباب الرئيسية لنجاح ثورة 25 يناير أنهم كانوا دائماً في خانة المعتدى عليهم .. والنظام السابق كان دائماً في خانة المعتدي

فإذا بغلق المجمع ينقل الثوار الى خانة المعتدي .. وبالتالي فقد اكتسبوا بالفعل سخط قطاع عريض من الشعب المصري .. حتى انه كان من الصعب حينها ان تركب اي وسيلة مواصلات دون أن تجد من يسب الثورة ويلعن الثوار ..

فقرر المعتصمون فتح المجمع وكان ذلك -في رأيي- لسببين :

1- ان غلق المجمع بالقوة يعطي الجيش الحق في التدخل لفض الاعتصام وفتح المجمع .. وقد كنا جميعاً مقتنعين وقتها انه اذا فشل هذا الاعتصام سواء بسبب الاختلافات بين القوى السياسية وبعضها .. أو بفضه بالقوة .. فقد اجهضت الثورة الى غير رجعة .. وبالتالي فتح المجمع يعيد الثوار الى مسار التظاهر السلمي .. ويضع الجيش في خانة المعتدي اذا قرر فض الاعتصام بالقوة

2- ان المتظاهرين لم يقصدوا حقاً ان يضروا بمصالح الناس .. ولعل هذا كان السبب الرئيسي في اعادة فتح المجمع

الأثر الثاني المباشر للخطاب هو الحشد ..

فبالرغم من لهجة الخطاب الحادة وصيغته المتوعدة كان الغرض منها هو الترهيب والردع .. جاءت النتيجة عكس ما كان يأمله المجلس -كعادة المصريين تجاه هذا النوع من الخطابات والأمثلة كثيرة قبل تنحي مبارك- فقد زاد عدد المعتصمين في ميدان التحرير وجميع ساحات الاعتصام في مختلف المحافظات .. كرد مباشر على الخطاب مفاده : أن المصريين لا يستجيبون للتهديد وأنه لا أحد يستطيع أن يملي أوامره على الارادة الشعبية .. وأن ما يريده الشعب سيكون رغم أنف الجيش نفسه ..

ولعل المجلس قد أدرك مضمون الرسالة واستوعبه جيداً .. فآثر السلامة وقرر أن يستجيب لمطالب المعتصمين .. بداية من التعجيل بهيكلة وزارة الداخلية مروراً بعلنية المحاكمات وحتى التعديلات الوزارية المرتقبة .. والبقية -في ظني- تأتي ..

أهم ما تعلمه المعتصمون من كل ذلك أن القوة الحقيقة للثورة تكمن في سلميتها .. سلمية حقيقية .. وكلما تمسكوا بالسلمية زادت مصداقيتهم وزاد رصيدهم عند الناس .. وكان اصعب على أعداء الثورة مهاجمتهم بأي شكل كان ..

يتبع ..

في التحرير ..

2011-07-11T09:21:00.000-07:00

التحرير .. كلمة أصبح ليها معنى مختلف .. مجرد سماعها بيشغل في دماغي شريط من المعاني والمشاعر والذكريات ..

مظاهرة .. مليونية .. اعتصام .. جمال .. بلطجية .. قنابل مسيلة للدموع .. أمن مركزي .. شهداء .. طوب وكسر رخام .. صلاة الفجر في جماعة .. لجان شعبية .. اغاني منير والشيخ امام .. حلقات نقاش سياسي .. ابتسامة مرهقة .. هتافات بكل اشكالها .. فيس بوك وتويتر .. التشهد قبل النوم وأول ما اصحى .. مقشة وجوانتي .. رغيف عيش ومثلث جبنة .. رسومات على الأسفلت .. الدفء والأمان اللي بتحس بيه مع كل شروق شمس ..

التحرير حالة ..

حالة كل اللي حس بيها مرة ادمنها .. واصبح البيات في التحرير بالنسبة له أفضل من سريره الدافئ ووجبته الساخنة في بيته

في التحرير بتحس بالأمل بيشع من كل شخص تكلمه، بعد ما كنت حاسس باليأس بيشع من مصر كلها .. تقدر تشم الشجاعة والنبل والكرم في هواء الميدان

في التحرير مفيش ظالم ولا مظلوم .. المكان الوحيد اللي ممكن تنام فيه في الشارع وانتا مطمن ..

التحرير هو الدولة اللي كل المصريين نفسهم يهاجروا ليها .. هو الدولة اللي بتحترم حقوق مواطنيها وآدميتهم .. وتحافظ على امنهم .. دولة مش محتاج تبقى غني فيها عشان تعرف تعيش .. دولة لا تتعامل بالعملة والنقود .. وانما تتعامل بالشعور المتبادل بالمسؤولية تجاه كل من حولك

جربت مرة تبقى نايم على الأرض بردان .. تلاقي واحد لا تعرفه ولا يعرفك راح مغطيك ببطانية من غير ما تطلب ؟

جربت تقسم ساندوتش مع اللي جنبك وتحس بالشبع لمجرد انه اكل معاك ؟

لأ ؟ .. طب ما تنزل وتجرب ؟

في التحرير سبق كوني لم يتكرر من قبل .. ولن يتكرر في اي مكان خارج مصر ..

في التحرير تغضب ضاحكاً .. تبكي ضاحكاً .. تشعر بالاحباط والارهاق ضاحكاً

في التحرير ..

كارثة في الطريق

2011-07-02T16:10:00.000-07:00

الحمد لله خلصت امتحانات انهاردة ..

الفترة اللي فاتت دي كنت منقطع تماماً عن اللي بيجرى في البلد .. اي حد في هندسة فاهم ليه طبعاً ..

المهم .. اكتشفت ان انقطاعي عن الأحداث ده ميزة مش عيب ..

عارف لما تبعد فترة عن حد من صحابك .. سنة كدة ولا حاجة .. لما تشوفه تاني بتلاحظ تغيرات في ملامحه عن آخر مرة شوفته فيها .. بتلاحظ حاجات ماكنتش هاتلاحظها لو كنت بتشوفه كل يوم ..

آخر عهدي بأحداث ما بعد الثورة كان لما كل الناس كانت بتحيي وتشكر شباب الثورة على دورهم العظيم وتضحياتهم العظيمة واخلاصهم العظيم لبلدهم .. وبعدين بعدت عن المشهد لمدة شهر واحد .. ورجعت شفت مشهد مختلف تماماً ..

الداخلية ضربت ناس في قلب ميدان التحرير بالقنابل المسيلة للدموع .. ودلوقت بقى اي حد بينزل ميدان التحرير بيتقال عليه بلطجي .. حتى لو كان من أسر الشهداء ..

حاسس انني ركبت آلة زمن ورجعت 6 اشهر لورا ..

ازاي حد يموت تاني بأيد الأمن المركزي .. بعد الثورة ؟

ازاي اصلاً الأمن المركزي يدخل ميدان التحرير تاني ويضرب قنابل مسيلة للدموع عشان يطرد الناس .. بعد الثورة

تحس ان ضباط الأمن المركزي اما في قمة الغباء او في قمة السادية .. وفي كلا الحالتين اكيد مكافحة الشغب مش المكان المناسب ليهم ..

ازاي كده ؟ .. بعد الثورة خد بالك

طب ازاي كده ؟ .. بعد الثورة برضه

ولو اني مبحبش الوفد .. بس اكيد مافيش دخان من غير نار .. يبقى ازاي كده ؟

وقبل ما نتهم حد بالكذب .. لازم ندور على الدافع من وراء كذبه الأول .. واكيد محدش هايكسب حاجة لما يتبلى على الداخلية .. يبقى ازاي كدة ؟

تقدر تقارن بين الداخلية قبل الثورة ودلوقت؟

طب تقدر تقارن بين تصريحات اعضاء الحزب الوطني قبل الثورة و تصريحات لجنة الوفاق القومي دلوقت ؟

انا عايزك ترجع بضهرك لورا وتبص للصورة من بعيد شوية .. وبعدين رد على سؤال بسيط ..

احنا بجد عملنا ثورة ؟

عندي شعور عنيف بأن في كارثة هاتحصل .. شعور بيعصرني عصر ..

الكارثة دي حاجة من اتنين :

1- الثورة هاتتسرق مننا .. ودا بيحصل فعلاً بس شوية شوية .. واحنا للأسف نايمين على وداننا ومشغولين اوي بالدستور الأول ولا الانتخابات الأول ..

2- اننا ناخد بالنا من اللي بيحصل متأخر .. وساعتها لو حاولنا ننقذ الموقف .. هنلاقي نظام جديد-قديم كامل واقف في وشنا .. ونبقى بنعيد الكرة من جديد مع اختلاف بسيط .. اننا مش هنلاقي جنبنا الناس اللي خايفة من الانفلات الامني أو الناس اللي خايفة على اكل عيشها .. ببساطة هانبقى واقفين لوحدينا .. وتهم البلطجة و "تعطيل عجلة الانتاج" و "تهديد الاستقرار" -مش واخد بالك انتا- جاهزة ومستنيانا ..

احساسي بالغضب اكبر بكتير من احساسي بالاحباط .. حاسس نفس الشعور اللي حسيت بيه يوم 28 .. بالرغم انه من يوم ما عدى وانا بادعي ربنا مانشوفوش تاني ..

انا مش ناوي اعيش لحد ما الاقي البلد رجعت لنقطة البداية .. ياما اخدلي عصاية على دماغي في فض مظاهرة .. او اتخنق من دخان قنبلة .. او اخدلي رصاصة مطاطي "اصابة خطأ" .. أو حتى يتقبض عليا بتهمة التحريض أو البلطجة واخدلي عشرة خمستاشر سنة في سجن حربي .. اي حاجة غير ان البلد تبقى بتغرق تاني وانا عايش وحاضر لحظة غرقها ..

العمر واحد والرب واحد .

وللحديث بقية ..

سكتناله دخل بحماره

2011-05-22T17:04:00.000-07:00

بشكل عام انا مش ضد الجيش ومش ضد المجلس العسكري .. لكن انا ضد الممارسات المعتوهة والسياسات المتخلفة

وعموماً دا كان شيء متوقع لما قيادة عسكرية فجأة تلاقي نفسها بتحكم دولة .. الموضوع عامل زي ابنك اللي عنده سنتين .. تلاقي دايماً تصرفاته بدون وعي .. ماتقدرش تعتب عليه بحكم سنه .. لكن في نفس الوقت ماينفعش تسكت على التصرفات دي .. لازم تقول له "عيب يا ولد .. كخ .. مايصحش كدة .. اتأدب شوية"

احنا نازلين يوم 27 عشان نقول للمجلس العسكري كخ وكده عيب .. احنا نازلين نعيد الثورة الى مسارها الصحيح

باعتراف قيادات من قلب الداخلية .. في بعض القيادات العيا أمرت صغار الظباط انهم يستهبلوا ومايشتغلوش .. عشان مانقعدش نلف حوالين نفسينا ونقول هي فين الشرطة وليه لسه في انفلات امني بعد 3 اشهر من الثورة .. ويوم ما شفنا الأمن الركزي للمرة الأولي من يوم 28 يناير .. كان جي يضربنا عند السفارة الاسرائيلية .. دي شهادة محمد عفت الصحفي عن اللي حصله لما اتقبض عليه .. يعني بعد لما نقعدهم في بيوتهم 3 اشهر لابسين طرح .. ونزلنا نعمل شغلهم بدالهم .. أول ما يظهروا يضربونا ويشتمونا .. تخليص تار هو ..

حد بيتفرج على التليفزين المصري ؟ .. حد حاسس بالفرق بين دلوقت وقبل الثورة ؟ .. انا بقى حاسس ..

قبل الثورة كانوا بيطبلوا لمبارك .. دلوقت بيطبلوا للمجلس العسكري .. يمكن يكون المجلس مطلبش حد يطبله .. بس في ناس متعرفش تعيش من غير ما تبقى بتطبل لحد .. الناس دي معادش ليها مكان في اعلام ما بعد الثورة .. شوف لما معجبهمش كلام بثينة كامل كان ايه رد الفعل

وايه موضوع المحاكمات العسكرية اللي شغالة الله ينور ؟ .. وكل مظاهرة تنتهي بالشرطة العسكرية نازلة تطوق الضرب في المتظاهرين ..

يعني الموضوع بدأ بضرب مرة وتاني يوم كان "اعتذار ورصيدنا يسمح" .. شوية كدة وكمان علقة بس من غير اعتذار .. ومن ساعتها والضرب شغال فلة وشمعة منورة وبقينا ملطشة .. وكل ما نتكلم الجيش يقوللك "ولد! .. انا اللي حميت الثورة يا ولد." وتلاقي القلم نازل على قفاك يطرقع ..

هو انتوا جيتوا تحمونا ولا جيتوا تضربوا وتعتقلوا فينا .. طب جيتوا ليه ما مبارك كان عامل الواجب وزيادة الصراحة ..

مش هاتكلم على بلالين الاختبار اللي كل يوم والتاني تفقعلي ......... مرارتي.

الأمن الوطني نزل الجامعات .. الأمن الوطني مانزلش الجامعات

المصرين في الخارج مش هايصوتوا .. المصريين في الخارج هايصوتوا

مبارك راجل كبير وصاحب عيا نعفي عنه .. مين بس قال اننا هانعفي عنه

قاتل خالد سعيد خد براءة .. قاتل خالد سعيد مخدش براءة

قضايا اموال عامة ايه دي اللي رايحين تحاكموا فيها العادلي .. يعني ايه الفكرة في اني احكم على واحد بالسجن كام سنة لما الحكم في القضية اللي بعديها هايديله اعدام ؟ .. مفيش دماغ خالص كدة ؟

طبعاً في شوية هامشيات كدة زي الطود الراسخ وسيد مشعل والراجل بتاع كلية اعلام ده اللي معندوش دم .. دا حالة خاصة من العمدا ورؤساء الكليات حبايب امن الدولة

في الأول كانت بياناتكوا واضحة وصريحة .. شوية شوية مباقيناش فاهمين حاجة ..

والنبي يا جدعان هما مين قوى الشر والظلام عشان ابقى عارف .. ريتا الشريرة ؟

جيشي .. يا حبيبي .. يا روح قلبي .. كخ كدة .. مش هاتفضل تمد ايدك عليا وانا اسكت وابلعها بمزاجي .. انا مش ملطشة .. واحذرني عشان لما بازعل زعلي بيبقى وحش ..

دي مطالبنا بمنهى البساطة

الشفافية هي الحل.

ولو حسيت باليأس ..

2011-04-20T10:13:00.000-07:00

عشان ابطل الغباء اللي بعمله دا ..

بص قدامك .. لسه في كتير يتعمل .. متعدش تقول يا ريتني كنت عملت وياريتني كنت نيلت .. لسه في كتير يتعمل .. ولو مبدأتش دلوقت هاتفضل طول عمرك تقول يا ريتني كنت عملت.

بص قدامك وبطل تبص وراك .. اللي فات فات خلاص ومش راجع .. ولو ملحقتش مكان في اللي جاي هايفوت هو كمان ومش هايرجع .. وانتا هاتفضل واقف محلك سر.

بص قدامك واعقل .. اعرف قدرات نفسك .. الحقيقية مش اللي العالم بيحاول يقنعك بيها .. قدراتك الحقيقية اكبر بكتير .. اعظم بكتير مما تتخيله انتا نفسك .. اعرف ان مفيش حد زيك في الدنيا كلها .. اعرف انك متميز عن كل البشر اللي عايشين.

بص قدامك وانتا واثق في نفسك .. واثق في رأيك .. شيل من دماغك تماماً فكرة ان فلان يعرف اكتر منك أو فلان اكبر منك سناً يبقى رأيه اصح من رأيك .. كلام فارغ ! .. رأيك صواب يحتمل الخطأ .. ورأي الدنيا كلها خطأ يحتمل الصواب .. ودا مش غرور ولا حاجة .. لأن لو رأيك هو اللي خطأ يحتمل الصواب -من باب التواضع يعني- يبقى من الغباء انك تتمسك بيه .. ومن باب اولى تقتنع بالرأي الآخر !

بص قدامك وانتا مؤمن ان بكرة احسن من النهاردة .. كل يوم بيجيب معاه خير اكتر من اليوم اللي قبله .. لو مش مصدق بص حواليك .. وافتكر من اسبوع .. من شهر .. من سنة الحال كان ازاي ودلوقت بقى ازاي.

ولو في وقت من الأوقات حسيت باليأس .. اقرا تاني من الأول.

شعور بالذنب !

2011-04-19T15:46:00.000-07:00

شعور بالذنب يعتصر قلبي اعتصاراً .. كلما مر بي مشهد من مشاهد 25 او 28 او 2 فبراير

اشعر بالذنب اني عدت لبيتي سليماً ليس بي خدش و كثر من ماتوا ومن اصيبوا .. اشعر بالذنب اني كنت انام كل ليلة في فراش دافئ ممتلئ المعدة وهناك من ينام في العراء في جو قارص البرودة ويأكل ما يكفيه بالكاد ليبقى حياً ..

الزمان : الأربعاء 26 يناير .. الساعة السابعة مساءا
المكان : امام نقابة المحامين

أول ايام مشاركتي في الثورة .. مشيت في اتجاه ميدان عبد المنعم رياض .. كنت ماشي على الرصيف وكان في ناس كتير واقفة جنبي بتتفرج على مجموعة من المتظاهرين واقفين قدام النقابة وعدد ضخم من الأمن المركزي محوطهم ..

عدد المتظاهرين اقل بالمقارنة بعدد الأمن المركزي .. ومع ذلك واقفين وبيهتفوا بأعلى صوتهم ..

قعدت افكر .. يا ترى هما مش عارفين انهم ممكن يعتقلوا كلهم بدون مجهود يذكر .. ليه محاولوش يهربوا بدري شوية قبل ما العدد يقل كده .. ومكانش في رد منطقي غير انهم مش خايفين من الاعتقال .. كنت باحسدهم على شجاعتهم .. كنت باتمنى ساعتها لو عندي نص شجاعتهم عشان اقف زيهم كدة واهتف بأعلى صوتي ضد الظلم والفساد من غير ما اخاف من اعتقال او تعذيب او غيره.

انا كنت عارف ان في مظاهرة تانية في عبد المنعم رياض وهي دي اللي كنت ناوي اروحها .. بس وانا ماشي فجأة لقيت بوكس شرطة جاي من ناحية الميدان ووقف قدامي بحوالي 20 متر .. نزل منه 6 مخبرين كانوا عاملين زي المسروعين .. بيجروا في كل اتجاه بيدوروا على حد يمسكوه .. واحد فيهم شافني وانا رايح ناحية الميدان فجري ناحيتي وقاللي : انتا رايح فين ؟ ارجع ! .. فقلتلوا انني معدي رايح الموقف .. فراح ضاربني بقبضتيه في صدري رحت راجع لورا خطوتين .. لسه هاقوله انتا بتضرب ليه لقيت زمايله كلهم بيجروا عليا ..

انا قدرت اني لو اتمسكت يا هاتعجن علقة محترمة و هايعتقلوني .. ومدام اقدر اجري يبقى من الغباء وليس الشجاعة اني اقف لأي سبب .. رحت لافف وجريت بأقصى سرعة على الرصيف عكس الاتجاه اللي جيت منه .. الناس شافتني باجري راحوا طالعين يجروا هما كمان ..
بعد ما جريت مسافة لا بأس بها وقفت وبصيت ورايا لقيت المخبرين اصطادوا واحد ووقعوه على الأرض ونازلين ضرب فيه زي مايكون كيس ملاكمة .. بأيديهم ورجليهم و عصيان .. زي ما يكونوا بيضربوا واحد كافر .. المهم انا كملت جري شوية بس كنت مصمم اوصل ميدان عبد المنعم رياض ..

دخلت شارع جانبي وطلعت على شارع موازي للشارع اللي فيه نقابة المحامين .. مشيت تاني في اتجاه الميدان وانا قاعد اتلفت حواليا وحاسس ان كل الناس اللي ماشية جنبي مخبرين ..

كان المفروض اني لما اوصل الميدان اتقابل مع خالد صديقي .. وبما اني عمري ما مشيت في مظاهرة قبل كده وعمري ما اتقبض عليا فكنت عايز اؤمن نفسي .. فحطيت الموبايل في قلب الشراب عشان لو اتقبض عليا مايخدهوش مني واعرف اكلم حد .. وطلعت البطاقة من المحفظة حطيتها في جيب الجاكيت وحطيت المحفظة نفسها في فردة الشراب التانية .. ولما وصلت موقف الأوتوبيسات اللي عند الميدان كلمت خالد صديقي اللي كان في المظاهرة عشان اعرف هو فين ونتقابل .. رد عليا بجملة واحدة مقتضبة : روح بيتكو دلوقت وتهوبش ناحية الميدان .. سألته :ايه في ايه عندكو .. كرر نفس الجملة بالنص وراح قافل ..

الموضوع كبر في دماغي وقلت هاروح يعني هاروح .. فضلت اناور من حوالين كماين الشرطة والمدرعات لبعض الوقت عشان اعرف اوصل لداخل الميدان بدون نتيجة .. بعد حوالي 10 دقائق خالد كلمني تاني وقاللي انتا فين قلتله انا لسه مامشيتش .. قاللي طيب قابلني عند المتحف .. رحت قابلته .. كانت عينيه مورمة من اثار القنابل المسيلة للدموع وفهمت منه ان كان في كمية بلطجية ومخبرين منتشرين في المنطقة بيعتقلوا عشوائي بعد ضرب مبرح .. وروحنا مع بعض من غير ما اشوف المظاهرة حتى !

كنت ماشي حزين جداً اني مقدرتش اشارك في المظاهرة .. ابويا وامي سافروا النهاردة العصر اسكندرية وراجعين يوم الجمعة بليل .. ولولا كده مكنتش عرفت اخرج من بيتنا اصلاً

يوميها كانت الدعوات لجمعة الغضب بدأت تنتشر .. فقررت اني ان شاء الله نازل من أول اليوم

الجمعة 28 يناير

صحيت الساعة 9 تقريباً وبدأت اجهز شنطة اسعافات اولية فيها كحول وقطن وشاش وخل عشان القنابل المسيلة للدموع ولفيت فوطة سميكة حوالين دراعي اليمين تحسباً لعصيان الأمن المركزي وقررت اني انزل شارع جامعة الدول العربية اصلي الجمعة واتحرك مع المظاهرة اللي هاتبدأ من هناك .. اتصلت بأمي على المحمول قلتلها ان في اخبار انهم ناويين يقطعوا شبكات الموبايل .. فلو حاولت تتصل بيا ولقتني خارج نطاق الخدمة ماتقلقش .. طبعاً ماقلتلهاش اني نازل المظاهرة عشان مايحصلهاش حاجة.

نزلت بالعربية .. كانت الشوارع فاضية تماماً مزيج من التوقيت وتوقع الناس لأضطرابات فمحدش نزل من بيتهم .. المشوار خد 20 دقيقة تقريباً .. ركنت العربية عند بيت اقاربي في جامعة الدول ورحت اصلي الجمعة في مسجد قريب من بيتهم ..

بعد الصلاة لقيت مجموعة من 15 شخص تقريباً دخلوا علينا الجامع .. واحد منهم قال : يلا يا جماعة احنا هانبدأ المظاهرة من هنا .. معدش السكوت مقبول .. تعالى معانا واطلب حقك في بلدك.

انضم ليهم 5 من عندنا كنت انا واحد منهم وبقينا تقريباً عشرين وبدأنا نمشي من ناحية فرغلي في اتجاه ميدان مصطفى محمود .. بدأنا 20 مثلاً وفضلنا نكلم الناس طول ماحنا ماشيين ونقولهم تعالوا ماتخافوش دا العمر واحد والرب واحد .. وصلنا عند هاردييز 60 شخص تقريباً .. لقينا في مظاهرة تانية جاية من شارع جانبي .. وقفنا استنيناهم وانضمينالهم وبقينا حوالي 200 شخص .. فضيلنا طول الطريق نأكد على بعض انه مانسمحش لحد يندس وسطينا ولو الأمن حاول يعتقل حد مننا مانسيبوش ونفضل ماسكين فيه ..

وصلنا ميدان مصطفى محمود وكان عددنا 500 واحد .. دخلنا شارع البطل احمد عبد العزيز وبدأ الهتاف .. يسقط يسقط حسني مبارك كان الهتاف الغالب .. الناس كانت بتهتف بغضب وحماس .. اول ما الهتاف اشتغل الناس بدأت تنضم لينا بأعداد كبيرة ..

بعد مسافة من السير في البطل احمد لقينا قدامنا تشكيلة امن مركزي قاطعة الطريق في اتجاه واحد من الشارع وسايبين الاتجاه التاني .. بدأنا نهتف سلمية سلمية وعدينا الناحية التانية المفتوحة .. راحوا مغيرين مكانهم بسرعة وقافلين الناحية اللي عدينالها .. دخلنا شارع جانبي بين العمارات واحنا لسه بنهتف يسقط حسني مبارك .. كل الناس بدأت تبص علينا من الشبابيك وعلى وشهم نوع من الفرحة .. وبدأوا يشجعونا ويهتفوا معانا .. فغيرنا الهتاف الى : يا اهالينا انضموا لينا

لفينا حوالين عمارة وخرجنا تاني على شارع البطل ورا ظهر تشكيل الأمن المركزي اللي قابلناه قبل كدة .. وكملنا مشي .. واحد من اصحاب المحلات في الشارع خرج كارتونتين مياة معدنية من عنده وحطهم على الجزيرة اللي في نص الشارع وبدأ يوزع مياة على المتظاهرين ..

مشينا شارع البطل لأخره وبعدين مشينا شارع الدقي لحد ما وصلنا لميدان الجلاء .. كان عددنا وقتها لا يقل عن 200 الف !

في ميدان الجلاء بدأت أول معركة بيننا وبين الأمن المركزي ..

الرؤية متعسرة من كتر القنابل المسيلة للدموع .. لكن الناس واقفة مابتجريش .. حاولت اوصل للصفوف الأولى عشان اشوف ايه اللي بحصل .. لكن كنت كل ما اقرب من الميدان تأثير الغاز يزيد عليا .. لحد ما وصلت لمرحلة اني ماكنتش عارف اخد نفس ومش عارف افتح عنيا .. رحت راجع تاني وانا شبه مش شايف قدامي وقاعد اخبط في الناس وانا ماشي وافتكرت ساعتها اني نسيت شنطة الاسعافات اللي كنت مجهزها عند اقاربي في جامعة الدول ..

واحد شافني بالمنظر ده راح ماسكني من ايدي وساحبني على جنب وغسلي وشي بالكوكاكولا .. حسيت بتحسن فوري فشكرته ورحت لافف الكوفية على وشي ومتقدم تاني .. وشفت الميدان لأول مرة ..

المنظر مرعب .. كميات ضخمة من مدرعات الأمن المركزي والجنود .. ودوي القنابل يصم الآذان بلا توقف .. لكن برضه الناس كانت ثابتة .. مجموعة من الشباب كانت بتجري ورا القنابل وتمسكها وتحدفها عليهم تاني .. بعد حوالي نصف ساعة من الكر والفر بطلوا ضرب قنابل وراحوا راجعين لآخر كوبري الجلاء .. تقريباً كانت القنابل اللي معاهم خلصت ..

قدمنا ودخلنا الميدان .. لقيناهم سايبين 3 ناقلات جنود على اول الكوبري اثناء تراجعهم .. بنبص جواهم لقينا عدد من الجنود كانوا فيها .. حاولنا على قد ما نقدر نحميهم عشان الناس كانت هتاكلهم حرفياً لحد ما قدرنا نهربهم ونكمل طريقنا .. الطريق قدامنا فضل مفتوح لحد كوبري قصر النيل .. ومن هنا بدأت اضخم معركة يومها.

عددنا كان لا يقل عن 500 الف .. ولما وصلنا على اول قصر النيل كانت الأمن المركزي قافل الكوبري من الناحية التانية وواقف مستنينا .. أول ما شافونا بدأ اطلاق القنابل المسيلة للدموع تاني .. لكن من ستر ربنا كان معظمها بيقع من فوق الكوبري في النيل .. كان تأثير الغاز علينا اقل نوعاً ما لأننا كنا مستحمين كوكاكولا وخل .. وبدأنا نضغط عليهم فبدأوا في التراجع البطئ .. وبعدين فجأة انشقوا نصين وعدت من بينهم عربية مطافي وقعدت ترش الناس بالمية .. انا ساعتها كنت واقف في ميدان الجلاء على التمثال اللي في نص الميدان مش فاكر تمثال مين .. وبحاول على قد ما اقدر اصور المعركة ..

بعد حوالي ساعة من الضغط والرش بالمية والقنابل .. شفت أول مصاب بخراطيش الرش .. الناس كانت شايلاه وطالعة تجري بيه .. نزلت وجريت وراه عشان اصوره .. لقيته خد الخرطوشة بالكامل في وشه ورقبته .. الدكتور اللي كان معانا لما شافه قال دا لو ماتنقلش دلوقت المستشفى هايموت .. كلمنا الاسعاف عشان تيجي تاخده واثناء ما حنا مستنيين لقينا عدد المصابين بيزيد بشكل مطرد .. قبل ما اول دفعة عربيات اسعاف توصل كان معانا حوالي 12 مصاب باصابات متدرجة الخطورة .. بعد حوالي 5 دقائق لقينا 3 عربيات اسعاف في ميدان الجلاء .. حاولنا على قد ما نقدر نركب المصابين كلهم في العربيات والاصابات الخفيفة تستني الدفعة الجديدة من العربيات.

المشهد دا كان بيحصل بالتوازي مع مشهد رش المصلين بالماء الشهير ..

الكوفية ساعتها كانت غرقانة بخليط من الكولا والخل .. فلما كنت بلفها على وشي ماكنتش باحس بأي اثر للغاز .. فقررت اني اقدم في الصفوف الأولى عشان اساعد في اصطياد قنابل الغاز ..

وصلت للصف الأول فعلاً لقيت حوالي 3 شباب رابطين كمامات على وشهم وبيجروا ورا القنابل .. فانضميت ليهم ووزعنا نفسنا على عرض الكوبري وبدأنا الشغل ..

ما بين كر وفر ومطاردة القنابل وتفادي سقوطها فوق رؤوسنا وتصفيق وتشجيع المتظاهرين .. واحدة من القنابل وقعت بيني وبين اللي واقف جنبي على الشمال .. لسه باجري عليها كانت هو وصل لها فعلاً ووطى يمسكها ..في نفس اللحظة سمعت صوت طلق ناري و لقيته وقع على الأرض ..

جريت عليه لأنه كانت واقع والقنبلة جنبه فخفت انه يتخنق .. خدت القنبلة ورميتها بعيد ورجعت ابص عليه لقيته مضروب بخرطوش رش في رقبته وصدره بالكامل .. وكان بينزف من رقبته بحر دم .. حاولت اكتم خرطوم الدم اللي اتفتح من رقبته بدون فايدة ..

كان ساعتها واحد تاني من فرقة مقاومة القنابل جالي رحنا شايلينه قصاد بعض وطالعين نجري بيه على المستشفى الميداني في آخر المظاهرة .. على ما وصلنا لآخر المظاهرة كان الدم اللي بينزف من رقبته اقل كتير .. ولما وصلنا للمستشفى الدكتور قاللنا : البقاء لله يا جماعة .

احساسي ساعتها صعب الوصف .. كل اللي فاكره اني كنت باجري ناحية الأمن المركزي وانا بشتم كل الشتايم اللي بتيجي في دماغي وزميلي التاني اللي شال الشهيد معايا ماسك فيا من ورا وبيحاول يمنعني اني اجري على الأمن لكن مش قادر .. على ما وصلنا أول صف تاني راح منادي على ناس تمسكني معاه قاللهم : امسكوه يا جدعان دا رايح ينتحر .. دا مش في وعيه والله .. يا جدعان الحقوه هايموت روحه ..
2 كمان انضموله وبقى 3 ماسكنني لدرجة انهم شالوني من الأرض خالص عشان يمنعوني من الجري .. ساعتها حسيت بعجز شديد محسيتش بيه في حياتي قبل كده .. انهرت بالكامل وقعدت على الرصيف اعيط بشدة لمدة 15 دقيقة تقريباً ..

كل اللي كان في دماغي ساعتها انه لو كنت انا اللي وصلت للقنبلة الأول كان زماني انا اللي مت .. الشاب اللي مات ده -اللي عرفت بعد كده ان اسمه احمد مصطفى- انقذ حياتي من غير ما يعرف .. كان جزء من بكائي احساس شديد بالذنب .. ليه هو يموت بدالي ؟؟ .. هو اكيد كان عنده اسرة بتحبه .. كان عنده احلام لمستقبله و امال وطموحات .. يمكن كان خاطب واحدة بيحبها وبتحبه .. يمكن كانوا متفقين على جواز بعد ما يتخرج .. يمكن وهما قاعدين مع بعض مرة على كافيه ولا حاجة كانوا بيفكروا هايسموا اولادهم ايه .. كان عنده حياة كاملة .. ميفرقش عني كتير يعني .. يبقى ليه هو يموت بدالي ؟؟!

دلوقتي لما رجعت افكر في الموضوع بهدوء شوية اقتنعت ان محدش بيموت ناقص عمر .. ودا كان وقته هو مش وقتي انا .. لكن ماقدرتش اتخلص من الشعور بالذنب حتى هذة اللحظة.

الأمن في الوقت ده كان مستموت عشان مايدخلناش ميدان التحرير .. كان بيستخدم الخراطيش بغزارة مخيفة .. لدرجة ان المصابين كانوا بييجوا من قدام في طابور ورا بعضيهم ..

اقتنعنا ساعتها اننا مش هانقدر نلاحق على عدد المصابين دا كله في مقابل استمرار غباوة التعامل بهذا الشكل .. فقررنا اننا نتراجع وننزل الزمالك نلف قدام كل السفارات اللي فيها .. وحدث فعلاً لحد ما وصلنا لكوبري 6 أكتوبر وبدأنا نتجه تاني لميدان التحرير ..

لقينا في آخر الكوبري حوالي 20 عسكري امن مركزي 6 منهم ماسكين مدافع غاز .. اول ما شافونا بدأوا يطلقوا قنابل بغزارة واحنا بدأنا مرة تانية نطارد القنابل اللي ما وقعتش من فوق الكوبري ونرميها بنفسنا .. كل ما نحاول نقدم عليهم يبدأوا ضرب تاني .. لما نرجع شوية يبطلوا .. اتذكر في مرة من المرات واحنا بنجري عليهم بدل ما يضربوا القنابل في الهوا ضربوها في اتجاهنا مباشرة على مستوى افقي .. واحدة فيهم جت في ركبتي بكامل سرعتها .. محستش بألم كبير ساعتها نظراً لكمية الادرينالين اللي كانت في جسمي لكن لما رجعت البيت ركبتي فضلت وارمة 3 ايام ..

استمر الكر والفر دا لحد حوالي الساعة 6 .. فجأة لقيناهم لفوا وطلعوا يجروا ناحية الميدان .. مافهمناش ايه اللي بيحصل بالظبط .. حسينا انهم يمكن يكونوا بيجهزوا لهجوم كبير علينا ولا حاجة .. فبدأنا نتقدم بحذر شديد لحد ما وصلنا على مدخل التحرير .. لقينا كميات متظاهرين مالهاش حصر في قلب الميدان فدخلنا انضمينالهم .. وانا قررت انا ارجع البيت لأني كانت عارف ان امي ممكن يجرالها حاجة لو اتأخرت اكتر من كده خصوصاً ان مفيش شبكات موبايل عشان اعرف اكلمها .. وهي مخيبتش ظني كتير .. لما رجعت عند اقاربي في جامعة الدول كلمتها في التليفون عرفت انه جالها ازمة قلبية وهي بتتفرج على التليفزيون .. فقلتلها على سبيل التهريج مش قلتلك متتفرجيش على التلفزيون .. دا فيه سم قاتل.

مشاهد كتير اليوم ده مش هانساها ما حييت ..

مشهد الناس وهي داخلة على كوبري قصر النيل .. انا كنت وقف فوق تمثال عالي ومع ذلك عينيا مش جايبة آخر المتظاهرين

وانا وقف فوق كوبري قصر النيل بصيت على يمني وشمالي لقيت الكباري الموازية لينا عليها مظاهرات تقريباً بنفس حجم مظاهرتنا متجهة لميدان التحرير .. حسيت بالأمل وبدفعة معنوية خليتني اقدر اكمل لحد ما دخلنا الميدان

تالت حاجة وهي مش مشهد بالظبط .. لكن لما كنا شايلين الشهيد احمد وبنجري بيه على المستشفى ودمه مغرق هدومي .. ريحة دمه ماكنتش الريحة الصدئة المألوفة .. كانت ليه ريحة عطرية محببة ..

يمكن الريحة كانت جاية من حاجة تانية -ولو انه صعب في وسط الغاز دا كله- .. او يمكن كان بيتهيألي .. خصوصاً اني ماكنتش نايم كويس ومحطتش لقمة في بقي من ساعة ما صحيت الصبح .. دا غير ان المظاهرة مشيت ما لا يقل عن 8 كم ما بين قنابل غاز ومطاردات فكنت مرهق بشكل شنيع .. بس لحد دلوقت مش قادر انسى الريحة دي.

أخذت عهد على نفسي انه كل ما اعدي من فوق كوبري قصر النيل لازم اقرأ الفاتحة على روح الشهيد احمد وكل الشهدا اللي ماتوا يوميها.

يا رب ارحمهم جميعاً وارزقنا شفاعتهم اللهم امين.

تعليقاً على هجوم الجيش على الميدان

2011-04-11T10:58:00.000-07:00

صحيح انا قلت ان الجيش كان لازم يعمل كده .. بس احنا بطبعنا شعب عاطفي ..

الموضوع عامل زي ما يكون ابنك مصاب بمرض معدي خطير مالوش علاج .. ومضطر انك تضربوا بالرصاص عشان تنقذ باقي الأسرة.

كنت في حالة بكاء هستيري عنيف وانا بقرأ النوت دي

وبعدين شفت الفيديو ده

وبرضه لسه مش فاهم حاجة .. صحيح الجيش كان لازم يعمل كده .. بس دول اخواتي واخواتك .. مهما كان، الوضع مش سهل ابداً .

---------------------------------------------

صحيح مايكل نبيل دا عيل ابن وسخة آراءه كلها تجيبلك ضغط وانتا بتقراها .. بس لو احنا بندور على ديمقراطية حقيقية يبقى من حق كل واحد يقول اللي هو عايزه مهما كان سخيف وسمج زي كده .. بس برضه من حقه يقول اللي يعجبه.

وانا رأيي ان قرار المحكمة بسجنه قرار جائر جداً .. يمكن لو مكانش شتم قيادات الجيش بألفاظ نابية مكانش لبس في الحيطة .. في الأول والآخر اسمها سب وقذف.

اكبر تحدي يواجه عمرو موسى

2011-04-11T01:58:00.000-07:00

وانا بقرأ عناوين الأخبار لقيت خبر بيقول ان الجامعة العربية تدعو لفرض حظر جوي على غزة لحمايتهم من قصف الطيران الأسرائيلي .. بغض النظر عن كوني متأكد ان مفيش حد هايعبرهم اصلاً .. بس كنت سعيد بموقف جامعة الدول نفسه اللي من زمان مشفناش زيه .. وقلت ياااه .. صح النوم يا موسى .. بس لما رجعت فكرت في الموضوع تاني .. لقيت انه مصحيش دلوقت بالذات صدفة ..

هل يا ترى هو صحي دلوقت عشان النظام اللي كان مكتفه مشي وبقى قادر يتكلم براحته ولا عشان بيحاول يحسن صورته قدام الشعب المصري قبل انتخابات الرياسة اللي ناوي يترشح فيها ؟

عشان ابقى صريح انا من مشجعي التانية .. لأنه بكل بساطة لو هو واحد ذو ضمير يقظ .. كان من الأحرى به ان يستقيل اذا منع من قول كلمة الحق .. لكن بما انه رضي انه يبقى عروسة ماريونيت في ايدين النظام السابق .. ويبقى ليس ذو ثقل سياسي من اي نوع .. فبالتأكيد هو مش الراجل الكبارة اللي كنا معتقدينه.

طبعاً الناس كلها دلوقت مركزة في الشان الداخلي وحدش فاضي يتابع ايه اللي بيحصل برة .. وعموماً الصورة هاتتضح اكثر في المستقبل .. انا بس حبيت اسجل فكرة جاتلي.

على فين ؟! (3)

2011-04-11T01:43:00.000-07:00

طبعاً عرفنا كلنا ايه اللي حصل فجر السبت 9/4/2011 .. بس قبل ما نرجع لأحداثه خلونا نتكلم شوية عن المظاهرة المليونية اليوم اللي قبله ..

انا كنت في اسكندرية يوم الخميس الصبح بزور وليد صاحبي ورجعت يوم السبت بالليل .. فمحضرتش مليونية التحرير للأسف .. لكن حضرت مظاهرة القائد ابراهيم اللي بدأت حوالي الساعة 9 .. وبعد صلاة الجمعة بحوالي نصف ساعة بدأنا نتحرك باتجاه المنطقة الشمالية العسكرية عشان نكمل وقفتنا الاحتجاجية هناك .

الشعور كان لطيف نوع ما يحوي لمسة من الحزن .. لأنه دي كانت اول مرة اشارك في مظاهرة متحركة من ايام جمعة الغضب .. فافتكرت الأحداث المريرة تاني .. وكنت كل ما يهتفوا للشهداء الاقيني عمال اعيط .. حتى وليد نفسه اضايق وكان عايز يشغلني بأي حاجة عشان ينسيني .. وصلنا عند المنطقة الشمالية حوالي الساعة 5 .. قعدنا لحد الساعة 8 تقريباً ومشينا ..

المظاهرة بدأت من مسجد القائد ابراهيم مروراً بشارع بورسعيد بالكامل .. من بطئ الحركة وضخامة الأعداد حسيت ان الشارع طوله 100كم .. مشينا شوية حلوين يعني

الأعداد في تقديري الشخصي كانت حوالي 200 الف ليس اكثر

عرفت بعد كده ان الأعداد في التحرير كانت غفيرة .. فوق المليون بشوية .. قلت الحمد لله ان كل العيون على التحرير دلوقت ..

كلمت خالد عشان اعرف منه تفاصيل اكتر على الساعة 4 كده .. اكدلي ان المشهد المميز هو وجود اوتوبيسات جايبة ناس من محافظات كتير عشان يشاركوا في المظاهرة .. بس اكدلي برضه ان مشافش اي ظباط جيش مع المتظاهرين زي ما كنا متوقعين .. طبعاً لأني مكانش عندي مصدر تاني اتأكد منه ساعتها .. قلت الحمد لله هاتعدي على خير ..

خلص يوم الجمعة وروحت على بيتنا واتفقت مع وليد اقابلو تاني يوم الصبح .. وصحيت يوم السبت الساعة 8:30 .. بابص على الأنترنت اكتشفت ان كان في حرب في التحرير في الفجر

طبعاً الباقي احنا عارفينه فمش هاعيده تاني

مين الغلطان ؟

اولاً انا كان ليا رأي .. الجيش كان لازم يعمل كده حفاظاً على وحدة وتماسك المؤسسة العسكرية .. لأنها لو ظهرت ضعيفة قدام اي حد من جوة أو من برة .. البلد هاتتفرتك من الفوضى .. بس انا مكنتش موافق على كمية العنف المستخدمة ضد المدنيين .. واحد صاحبي اضاف على رأيي جزء يخص النقطة دي بالذات وانا اقتنعت بيها بصراحة .. الجيش تعامل مع الظباط اللي كانوا في الميدان دول على اساس انهم متمردين .. وبما اننا في حالة طوارئ يبقى التمرد عقابه الاعدام فوراً .. ولا شفقة لمن يحمي المتمردين -اللي هما المتظاهرين المدنيين طبعاً- فكان لازم الجيش يعمل كده أولاً عشان يقبض على الظباط دول .. ثانياً اذا كان الجيش ضرب في المدنيين فده لأنهم كانوا بيمحوا ظباط متمردين وبالتالي استحقوا اللي حصل ..

انا مكنتش باصص للموضوع من الزاوية دي .. وبيتهيألي ناس كتير مبصيتش من الزاوية دي .. وعلى الرغم من انها وجهة نظر سليمة .. لكن في النهاية في مدنيين ماتوا برصاص الجيش ودي بداية الكارثة اللي انا كنت متوقعها من فترة ضمن سيناريو اصطدام الجيش بالناس.

من الزاوية التانية المتظاهرين مكانوش يتعاملوا مع الظباط دول على انهم متمردين .. بل على انهم ناس شريفة شافت حاجة غلط في الجيش وجت تفضحها وبالتالي استحقوا حمايتهم.

ولو بصينا لعواقب ما حدث .. نلاقي ان نبرة الناس ضد الجيش بدأت تزداد حدة .. وتصرفاتهم بدأت تزداد توتر .. ناهيك عن ان ميدان التحرير اتقفل بالمتاريس تاني

لكن في النهاية اعتقد ان دي نتيجة ارحم من السيناريو البديل .. وهو حدوث انشقاقات بالجيش ..

من أول هنا الرؤية ضبابية تماماً .. مش قادر اتوقع تصرفات الجيش بعد كده هاتبقى ازاي .. وبرضه مش قادر اتوقع تصرفات الناس هاتبقى ازاي .. والحمد لله ان خطاب مبارك جه عشان يلهي الناس شوية عن الجيش والمجلس لحد ما الدنيا تهدى شوية.

----------------------------------------------------

مبارك طل علينا يوم الحد بطلعة صوت امه البهية من قناة العربية اللي اذاعت له تسجيل صوتي ملخصه انه لا يملك اي ارصده أو املاك خارج مصر لا هو ولا عائلته وكل املاكه داخل مصر مذكورة في تقرير الذمة المالية الأخير اللي سلمه .. وان التحقيقات هي اللي هاتثبت صدق كلامه ..

طبعاً مفيش داعي نذكر كم الاستفزاز اللي بيصب من محتوى كلامه .. ولا رد فعل الناس طبعاً .. بس كان في هاشتاج مخصوص معمول على تويتر عشان الناس تخرج جام ابداعها على مبارك

النظرة السطحية تقول ان الغرض من الخطاب ده هو استعطاف الناس خصوصاً لأنه صادف وقت استدعاء النائب العام لمبارك وولاده للتحقيق معاهم .. وخصوصاً بعد حبس زيكو 15 يوم .. الراجل قال اقلهم كلمتين يكمن قلبهم يحن عليا .. طبعاً بعد ما الناس كانت منقسمة ما بين عداء المجلس العسكري والدفاع عنه .. ومابين مرشحين الرئاسة .. ومابين ليبرالي وسلفي واخوانجي .. الناس بعد ما سمعت الخطاب رجعت توحدت كلها على هدف واحد .. محاكمة ابن المرة ده في اقرب فرصة .. كتر خيرك يا مبارك.

الطريف ان الناس قررت ان الجمعة الجاية هاتكون جمعة الزحف .. اللي هايزحفوا فيها على شرم الشيخ عشان يجيبوا مبارك بنفسهم يحاكموه .. وممدوح حمزة اعلن انه على استعداد لنقل المتظاهرين على نفقته الشخصية الى شرم الشيخ .. وتعاقد بالفعل مع 1800 اوتوبيس هايكونوا موجودين في ميدان التحرير -معرفش ازاي بس ماشي- يوم الجمعة الساعة 6 صباحاً.

قد تكون الصورة هزلية بعض الشيء لكن الأكيد ان حتى الدعوة لحاجة زي كده تقلق السلطات بداية من المجلس والجيش مرور بالوزارة وحتى وزير الداخلية .. وتقديري الشخصي انه قبل نهاية الأسبوع هانسمع ان مبارك محبوس على ذمة التحقيق -يوم الخميس مثلاً زي عوايدهم- عشان يتجنبوا حدوث صدامات واسعة مع الناس في شرم الشيخ .. اذا كانوا هايسمحوا اصلاً للأوتوبيسات انها توصل.

النظرة الأكثر عمقاً بعض الشيء تقول ان صيغة الكلام وكم البجاحة اللي فيها ان دلت على شيء فهي تدل على ان مبارك انتهى من تستيف ورقه واخفاء ارصدته وفرم كل ما يدينه و جاي يقو تعالوا فتشوني بقى انا جاهز اهو .. طبعاً نظرية المؤامرة هاتحتم ان المجلس كان على علم باللي مبارك بيعمله وبالتالي هو متواطئ معاه عشان يخفي الفلوس والأدلة .. ولذلك في قطاع من الناس ازداد كرهاً تجاه المجلس ..

والزاوية التانية -اللي انا بشجعها- بتقول ان المجلس لم يكن له علاقة باللي حصل ده .. وانهم اتفاجئؤا بالتسجيل زينا بالضبط

يعني في كل الحالات انا شايف ان التسجيل ده لم يضف جديداً .. كلنا كنا عارفين من أول يوم ان مبارك بيخفي الأدلة وبيخبي الفلوس .. ولو كان عمل حاجة -التسجيل- فهوا فكرنا بس باللي كان بيحصل مع مستندات امن الدولة .. فالناس سخنت تاني وزي ما قلت قبل كده نبرتها تجاه المجلس بتزداد حدة كل يوم المجلس بيتباطأ.

وعموماً من هنا لحد يوم جمعة الزحف انا واثق اننا هانسمع اخبار مفرحة بخصوص مبارك.

---------------------------------------------

ختاماً عايز أقول ان بفرض أسوأ سيناريو ممكن وهو ان المجلس متواطئ مع مبارك وبيحاول يمنع محاكمته وبيتستر على ارصدته .. احنا برضه اللي كسبانين .. تعالى نعمل ريتروسكوب ونتفرج ..

كسبنا ان مبارك اتخلع ومش ممكن يرجع تاني .. وحتى لو معرفناش نجيب فلوسه اللي بره .. فعلى الأقل مفيش فلوس جديدة هاتتسرق .. وقفنا النزيف يعني.
كسبنا أن كل الناس بقت بتقول رأيها بكل حرية ومحدش خايف من حاجة .. وأنا شايف ان ده أكبر مكسب حققناه .. وحدش هايعرف ياخده مننا تاني .. اصل هانخاف من ايه بعد الرصاص الحي ؟!

على فين ؟! (2)

2011-04-05T13:14:00.000-07:00

زي ما قلت قبل كده كل تصرف في الدنيا ممكن تفسرها بطريقة من 2 .. يا اما من باب حسن النية يا اما من باب المؤامرة

وبما ان انا على نياتي قوي وساذج بشكل مريع .. فلما بلاقي نفسي ميال اكتر للتفسير بتاع حسن النية .. باعرف انه غالباً تفسير المؤامرة هو الصح.

انا كنت حسن النية في الجيش على طول الخط .. كنت بلاقي تفسير لكل تصرف بيعمله ومبيعجبش الناس وبلاقيله الف عذر ..

وللأسف كنت دايماً باستبعد احتمالية كوني مخطئ بدون سبب .. نوع من المكابرة وانا اعترف بكده ..

او يمكن الذنب مش ذنبي لوحدي .. يمكن يكون ذنب كل واحد قال الجيش والشعب ايد واحدة .. وخلق من الجيش صنم بقى ممنوع انتقاده أو حتى التفكير في انتقاده ..

طب زي مانا بصيت للموضوع من ناحية حسن النية الخالصة .. ماتيجي نبص للموضوع من ناحية المؤامرة الخالصة.

فين مبارك ؟؟ .. مبارك في شرم الشيخ تحت الاقامة الجبرية .. طيب ايه الدليل ؟ .. مفيش دليل .. كل ما نملكه هو ثقتنا في كلمة الجيش

لحد دلوقت لم يستدعى للتحقيق معه في اي حاجة .. ولما راح محضر يسلمه اخطار رفض تسلمه .. هل يا ترى دا مقصود من الجيش ؟ .. يعني الجيش مثلاً ضاغط على مسار التحقيقات عشان متجيش رجل مبارك في حاجة ؟ وبعدين ييجي النائب العام يقوللك ان مبارك معاليهوش اي تهمة جنائية واحنا هانحاسبه في جرائم مال عام بس .. يا حلاوة يا ولاد .. ماهي اصلها امي اللي ادت اوامر بقتل 800 متظاهر .. وبعدين يقول ان التحقيق هايبقى في شرم الشيخ حفظاً للأمن .. يعني النقطة دي على ما انا متفق معاها على اد مانا دمي محروق بسببها .. تخيل انتا كده لو عرفنا ان مبارك جاي مكتب النائب العام .. انا عن نفسي هاروح ابات قدام المكتب قبليها بيومين عشان اعرف الاقي مكان مناسب اتف منه .. وبعدين لجنة استرداد الأموال تقوللك احنا اتاخرنا كتير .. لو كنا اتحركنا بدري شوية كنا لحقنا نعمل حاجة .. وكل دا كوم وموضوع ان مبارك ترك السلطة طواعية دا كوم تاني .. اصل احنا كنا نازليين نصيف في التحرير .. فبالصدفة واحنا هناك الراجل اتخلى عن الحكم .. والجيش تقريباً كان تايه وفجأة لقى نفسه متبعتر في شوارع مصر .. قاللك طب والله صدفة سعيدة مدام الشرطة مش موجودة يبقى بالمرة ننظم حال البلد مدام رجلينا وجنازيرنا جابتنا هنا.

واقرا المقال ده

دي كلها حاجات تقول ان الجيش مش عايز مبارك يظهر في الصورة اطلاقاً .. والأسباب لكده كتير .. بس واحد منها ان مبارك مايكونش في مصر اصلاً !

ودا يجيبنا لنقطة مهمة اوي .. علاقة مبارك بطنطاوي

على قدر معلوماتي الضئيلة .. اعرف ان طنطاوي فضل ماسك وزارة الدفاع لفترة طويييييلة اوي .. اتغيرت عليه حكومات كتير والراجل لسه راشق .. ودا ان دل على شيء فيدل على ان مبارك يا بيحبه لله في لله .. يا اما بيثق فيه جداً .. وبما ان التانية اكثر واقعية .. يبقى تعالى نتكلم فيها شوية

طنطاوي راجل من النظام القديم .. وليه بزنس وفلوس في البلد بالهبل .. وكل الناس عارفة كده ودي مش معلومة جديدة على حد .. يعني من الآخر هو كمان فاسد زي كل اللي كانوا جزء من النظام القديم .. طيب معلش تعالى ناخد اللفظ المطلق ونقول ان طنطاوي فاسد

يبقى طنطاوي فاسد .. ومبارك بيثق في طنطاوي .. ممكن نستنتج ايه من الكلام دا ؟

أولاً ان مش من المقنع على الاطلاق ان طنطاوي هو اللي جه ضغط على مبارك عشان يغور وبكده يكون هو اللي انقذ الثورة .. لو اي حاجة فيبقى هو اكيد حاول يدافع عن مبارك .. ويمكن يكون جه في دماغه انه يأمر الجيش بالضرب في المتظاهرين .. ومعرفش هل حط الفكرة دي موضع التنفيذ ولا لأ لأنه عارف انه 90% من الضباط ولا هايعبروه ومش بعيد يلاقي انقسامات شاسعة بعرض القوات المسلحة

ثانياً مش من المقنع ان طنطاوي يكون هو المؤتمن على حساب الفاسدين من اعضاء النظام السابق لأن هو اصلاً فاسد .. وأكيد هاييجي اسمه في قضايا فساد ومال عام .. ويكم هو دا اللي خلاه يتأخر على الثلاثي المرح

وشوف دول

http://www.youtube.com/watch?v=MlznS_h7zU4&feature=player_embedded

http://www.youtube.com/watch?v=5rtvv7aebvY&feature=player_embedded

وبما ان انا على نياتي وساذج زي ما اتفقنا .. فأنا حسيت بكم ما من الصدق في الكلام اللي اتقال .. وان كانوا هما فعلاً ضباط من القوات المسلحة يبقى هما ادرى بالموقف الداخلي للجيش مننا .. ويبقى هما يعرفوا طنطاوي اكتر مننا.

وبالرغم من ان الناس بدأت بالثقة في وجود الجيش وتوليه امور البلد .. الا ان شوية شوية الثقة دي بتتراجع والناس مش عارفة تلاقي سبب محدد للموضوع ده .. هل هو البطء ولا التصريحات المطاطة ولا المحاكمات المؤجلة ولا العنف اللي بيظهر فجأة ويختفي فجأة .. ولا ايه بالضبط ؟

هل البطء دا نوع من المماطلة لمحاولة اخفاء شيء ما ؟ .. ولا هو نوع من الرصانة السمجة التي لا تحترم المشاعر الثورية ؟

المهم ان الناس بتفقد الثقة بالجيش رويداً رويداً على عكس ما كان المفروض انه يحدث بحكم طبيعة استقبال الناس للجيش في اول الأمر .. ودا ان دل على شيء فيدل على ان الجيش بيتصرف غلط .. غلط بالمعنى العام .. يعني ممكن يكون بيحاول يعمل الصح بس مش موفق في قراراته .. أو هو جزء من المؤامرة وتصرفاته بدأت تشف عن كده.

في واحد صاحبي قاللي كلمة معجبتيش في وقتها .. وحسيت انه متشائم اكتر من اللازم .. بس يمكن دا يكون لأني على نياتي وساذج

قاللي الثورة الحقيقية لسه مبدأتش .. الثورة هاتبدأ لما الناس تبطل تقول "الجيش والشعب ايد واحدة" .. وتقول بدالها "الشعب والشعب ايد واحدة".

على فين ؟!

2011-04-02T13:00:00.000-07:00

عدت المليونية .. والعدد في التحرير كان لا بأس به بالنظر لعوامل كتير .. بس هو كان حوالي 400 الف .. بس طبعاً مصر مش التحرير بس .. ولو حسبنا الأعداد من كل المحافظات هنلاقي العدد اكتر من مليون بكتير ..

اتعشم ان الرسالة تكون وصلت للقيادة .. نحن هنا.

-------------------------------------------------------------

البيان 31 بتاع الجيش كان لطيف قوي .. انا شايف ان الغرض منه هو التسكين ليس اكثر .. خصوصاً ان تطبيقه جه سطحي ومايع والى حد بعيد مستفز .. يعني عبد اللطيف المناوي شالوه من رئاسة قطاع الأخبار وعملوه مستشار درجة اولى .. في ناس شايفة ان الغرض من التصرف ده انهم "يركنوه" على جنب .. منصب بدون سلطات فعلية

ولكنه لا يزال منصب بأجر .. يعني لسه بياخد مرتبه من جيوبنا

دا غير البورصة اللي بتقول انه مجالهاش اي طلب لتجميد اسهم الثلاثي المرح ..

وموضوع الأمن الوطني اللي نزل الجامعات يطلب كشوف بأسماء اتحاد الطلاب .. ودي انا قلبي مش عايز يصدقها عشان حتى لو هما فكروا يرجعوا للي كانوا بيعملوه قبل كده فهما اكيد مش بهذا الغباء عشان ينزلوا بشكل مباشر وواضح اوي كده

وال7 معتصمين اللي اعتقلوا من قدام المنطقة الشمالية المركزية في اسكندرية

مين ؟ فين ؟ ليه ؟ انا مش فاهم حاجة.

يعني هما بيعملوا كده عشان عايزين يهدوا الجو شوية .. امال لو كانوا بيحاولوا يولعوه كانوا عملوا ايه ؟

انا مش فاهم احنا هانعد نقول بكرة يفوقوا لحد امتى ..

من هنا ليوم الجمعة 8 ابريل يا رب يكونوا فاقوا وعرفوا ايه اللي المفروض يتعمل يا اما اعتقد ان هايبقى في تصعيد كبيرمن جانب المتظاهرين وغالباً هايبقى في اعتصام موسع

لو اللي بيحصل ده نابع من جهة تحاول الوقيعة بين الجيش والشعب .. فالجهة دي خارقة الذكاء .. كل المشاهدات بتقول ان في صدام قادم بين الجيش والشعب .. لكن محدش عارف يحط ايده على سبب محدد .. كلمة من هنا على تصريح من هنا على مقال من هنا .. على تصرف احمق من الجيش .. على تصرف احمق من المتظاهرين .. على تصرف احمق من الحكومة .. ماتبقاش عارف من مع مين ولا مين ضد مين .. ماتبقاش قادر تحدد مصدر محدد للثورة المضادة .. على طريقة "ثبت صنم" .. اول ما تدخل الدايرة تنهال عليك الأقفية من الزاوية التي لا تراها ..

لو حصل الصدام بين الجيش والشعب هايؤدي لحاجة من اتنين :

يا اما نقف ونسيب الجيش يضرب فينا من باب اننا عمرنا ما هانمد ايدنا على جيشنا اللي المفروض يحمينا ويدافع عنا .. ولو هو اختار يضربنا بالرصاص فاحنا اللي هانعمرله البندقية

يا اما هانرد الضرب .. وساعتها هانشوف حاجة شبه اللي بيحصل في ليبيا مع الفارق بين الجيش المصري والجيش الليبي من ناحية التنظيم والعتاد الى آخره

وفي اي من الحالتين .. اكيد هايحصل انقسام جوه الجيش .. وهي دي الطامة الكبرى .. لأنه اذا كان ضرب الجيش في الناس كارثة .. فضرب الجيش في بعضه كارثتين .. لأن الجيش في الوقت الحالي هو آخر خط دفاع داخلي وخارجي .. وركز اوي في خارجي ديه ..

انا معنديش مشكلة ان الجيش يضرب فينا .. وانا مستعد ابقى اول واحد انضرب .. بس يهمني ان الجيش يفضل متماسك ومتوحد عشان مفيش كلب من بره عقله يوزه يقرب ناحية مصر .. والكلاب كتير للأسف .. ومصر حلوة اصلها.

وبرضه عشان ماتبقاش الصورة قاتمة اوي كده انا شايف ان من رابع المستحيلات ان الجيش يفكر يضرب فينا .. صحيح قيادات الجيش ماهياش ملايكة منزلة .. ولكن الأكيد ان كلهم على عقيدة واحدة وهي ان الجيش مش شايل سلاح عشان يضرب بيه اهل بلده .. ولو الحال وصل لكده يبقى يموت هو الأول لحد آخر عسكري قبل ما يموت مدني واحد.

وما بين تأكدنا من موقف الجيش تجاه استخدام القوة .. وموقف المتظاهرين تجاه تحقيق مطالب الثورة .. في ايادي عمالة تلعب بالاتنين .. برضه بغض النظر عن المسمى .. المهم انهم ناس وحشين وخلاص .. وهما المستفيدين من الحالة اللي احنا رايحين ليها دي ..

مش من مصلحتنا خالص اننا مايبقاش عندنا نقطة مرجعية نقدر نرجعلها في حالة تخبطنا وحيرتنا

لازم يبقى عندنا على الأقل شخص واحد أو جهة واحدة بنثق فيها .. وثقتنا فيها غير قابلة للاهتزاز.

لأنه لو احنا على استعداد اننا نشك في اي شخص أو اي جهة .. يبقى احنا بنفتح الباب قدام الفلول عشان تزرع الشك -حتى لو مش موجود من الأساس- في قلوبنا .. وتقلبنا على كل شخص وكل جهة تري فيها خطر عليها .

اول لما الجيش نزل كنا هانطير من الفرحة وقاعدين نقول الجيش والشعب ايد واحدة .. دلوقت لما الجيش بيتأخر في تنفيذ المطالب بقينا نقول الجيش بيغطي على رموز النظام السابق

لما عصام شرف بقى رئيس الوزراء شيلناه فوق كتافنا في التحرير .. ولما نزل قانون تجريم الاعتصامات قلنا دا بيتآمر على الثورة

صحيح بطء تحركات الجيش ادت فرصة لناس كتير انها تدمر ادلة وتهرب فلوس .. وصحيح قانون تجريم الاعتصامات ده كارثة حقيقية -رأيي الشخصي- .. ولكن استعدادنا للشك في اي شخص -حتى في بعضنا- هو ما يعطي الفرصة للمستغلين واصحاب المصالح لكي يزرعوا الوقيعة بيننا وبين من لايجب ان نشك فيه.

الحذر كل الحذر .. واليقظة كل اليقظة.

الغباء قدر ومكتوب !

2011-03-31T10:27:00.000-07:00

في تصرفات تشوفها تحتار في تفسيرها .. هل يا ترى اللي عملها دا قاصد انه يعملها على شكلها كده ؟ ولا هو مش قصده وهي جات معاه كده؟

يعني على سبيل المثال .. مين صاحب فكرة نشر الاشاعة بتاعت الغاء المظاهرة المليونية بتاعت الجمعة 1 ابريل على التليفزيون ؟

اولاً الراجل ده انا شايف انه بص تحت رجليه ومبصش لقدام .. على المدى القصير هو راجل عبقري .. لأن نشر الخبر دا على التليفزيون هايوصل لكل الناس اللي بتتفرج على القنوات المصرية .. فغالباً كل اللي معندهمش انترنت هايصدقوا الخبر ومش هاينزلوا بكرة .. ودا هايخلي المظاهرة تخسر اعداد كبيرة في تقديري .. في نفس الوقت الناس اللي بتتفرج على الفضائيات أو عندهم انترنت هايعرفوا بسهولة ان الخبر كاذب .. ومن ناحية تانية التليفزيون خلق لنفسه عذر عشان مايعملش تغطية مباشرة للمظاهرة اللي بتطالب باقالة قياداته !

على المدى البعيد هو في قمة الغباء .. لأنه ان قدر المرة دي يلعب في دماغ البسطاء ويخليهم ماينزلوش .. مش هايقدر يعملها في المرات الجاية .. وفي نفس الوقت هايبقى كل اللي عمله انه سخن الناس عليه .. ويبقى جاب اجل نفسه بنفسه.

وعموماً الأيام جاية وهانشوف

-------------------------------------------------------------------------------------------

قناة العربية كانت عاملة تقرير عن اموال مصر المنهوبة في بنوك اوروبا وامريكا .. وقدروا الأرصدة بالتريليونات !

تخيل انتا تريليون جنية واحد بس -مش لازم دولار- ممكن يعملوا ايه لمصر .. وعشان تبقى عارف الدخل القومي بيقدر بحوالي 1300 مليار جنية سنوياً .. يعني احنا بنتكلم في دخل لمدة سنة جالنا من الهوا كدة .. يا ترى نزرع اراضي ونكفي نفسنا من القمح ولا نحسن التعليم ويبقى مستواه يضاهي مستوى الدول المتقدمة ؟ يا ترى نزيل العشوائيات ونبني مدن آدمية للناس تعيش فيها ولا نبني مصانع وشركات ونشغل كل العاطلين ؟ يا ترى نحسن مستوى الرعاية الصحية والمستشفيات ولا نصرف على البحث العلمي ؟ ولا ولا ولا ..

هما بيقولوا انهم اكتر من تريليون بكتير .. بس شوف انتا تريليون واحد فتح الباب لأحلام قد ايه ؟ .. اوعى تتخاذل في استرداد حقك .. البلد فضلت منهوبة لمدة 30 سنة و -سبحانك يا رب- فضلت عايشة .. تخيل لو كان فلوسها ليها .. كان بقى شكلها ايه ؟

------------------------------------------------------------------------------------------

جيشنا ماشي بالزق .. نقول في مليونية يجري يعمل اللي احنا بنطلبه .. بقالنا شهر لساننا دلدل على اقالة رؤساء تحرير الصحف القومية ومحاكمة زكريا وصفوت وسرور وتغيير قيادات ماسبيرو .. قوم ايه .. قبل المظاهرة بتلات ايام يبدأوا ينفذوا طلباتنا .. يوم الثلاثاء يغيروا كل رؤساء التحرير .. ويوم الأربعاء يقيلوا زكريا عزمي من ديوان رئيس الجمهورية -اللي معرفش كان لسه قاعد من ساعتها فيه بيعمل ايه بما ان مفيش رئيس جمهورية اصلاً .. تقريباً مكانش لسه خلص فرم- ويوم الخميس يجيلنا الخبر السعيد انه تم التحفظ على اموال الثلاثة ومنعهم من السفر .. لا يا شيخ ؟!

عموماً اذا كان دا من قبيل الصدفة البحتة - وهتحتاج حد بريالة عشان يصدق كدة- فمخسرناش حاجة وشكر الله سعيكم .. لكن لو الحاجات دي اتعملت عشان تهدوا المظاهرة .. فاحنا بنشكركوا لأنكوا عرفتونا المطالب بتتنفذ ازاي .. ولو كنتوا هديتوا المظاهرة دي بالاستجابة لمطالبها .. فا مش هايبقى قدامكوا اي خيارات غير انكوا تستجيبوا لمطالب كل مظاهرات المستقبل اللي ثبت بالدليل القاطع انها طريقة الحوار الوحيدة ذات الجدوى

توقعوا مستقبلاً مظاهرات ضد تأجيل المحاكمات على الفاضي والمليان و والمحاكمات العسكرية اللي مابتتفاهمش و تصدير الغاز لأسرائيل و .. و ..

واحنا وراكوا .. يا نصلحها .. يا نموت واحنا بنحاول.

مليونية جديدة

2011-03-29T13:20:00.000-07:00

النهاردة يوم الثلاثاء .. شهرين و اربعة ايام بالضبط منذ اندلاع الثورة في 25 يناير

الناس عاملة يوم الجمعة الجاية مظاهرة مليونية جديدة .. وعلى ما اتذكر آخر مليونية اتعملت كانت يوم الاحتفال بتعيين عصام شرف رئيس للوزراء .. من بعدها معظم المظاهرات كانت صغيرة -بتاع 2000 بالكتير- وغلبت عليها الفئوية .. المهم ..

المظاهرة الجديدة دي معمولة عشان الناس حاسة بحاجة مش طبيعية بتحصل .. بيسرقوا الثورة .. بيلتفوا على الثورة .. بيجهضوا الثورة .. سميها زي مانتا عايز .. بس هو الأكيد ان في حاجة سخيفة وغير طبيعية بتحصل تحت انوفنا .. واعتقد ان السبب في الشعور ده يرجع لمجموعة من العوامل :

1- الجيش بيتصرف زي الست اللي لسه والدة قريب .. بطء وخمول شديدين لدرجة تثير كل الشكوك اللي في الدنيا .. هل الجيش متخاذل ؟ هل متآمر ؟ هل مش قادر يمشي حال البلد ؟ .. كل ما نطلب حاجة يقول اصبروا هوا انا هاعمل ايه ولا ايه .. بس الفكرة ان في حاجات سهلة ومش معقدة وممكن تتعمل بسرعة .. ايه حكاية انه كل شوية يطلع يضربنا وبعدين يقول سامحوني مكانش قصدي .. من اول فض اعتصام التحرير بتاع "اعتذار ورصيدنا يكفي" .. ماشي يا عم .. ييجي بعد كده فض اعتصام السبت اللي كان اول مرة تظهر فيه العصيان الكهربائية .. وبعدين فض الاعتصام الثاني بالتحرير بعد اقالة حكومة شفيق بأسبوع تقريباً .. وأخيراً فض اعتصام كلية اعلام .. وتعذيب المتظاهرين في المتحف المصري ورامي عصام طالع في فيديو بيفرجنا على ضهره وهو مرسوم عليه خريطة طرق وكباري بالحروق والكدمات .. دا غير الاشاعة -مش عارف هي اشاعة ولا لأ- القوية اللي انتشرت بتقول ان الجيش كان بيكشف على المعتقلات من المتظاهرات كشف عذرية !

نعم ؟ .. ايه ؟ .. هل عايز تفهمني ان القوات المسلحة اللي هي اكثر اجهزة الدولة انضباطاً بيصدر عن ضباطها كل التصرفات الفردية دي ؟ .. والا هي مش فردية ؟ .. الله اعلم

2- الناس عملت الثورة عشان تطهر البلد من الفاسدين .. يبقى من المستفز ان بعد مرور شهرين على بداية الثورة يبقى لسه في ناس فاسدة في مناصب قيادية .. عندك مثلاً رئيس جامعة القاهرة اللي لسه محول اساتذة قسم صحافة بالكامل للتحقيق عشان بيساندوا طلاب كلية اعلام في مطالبهم واللي اهمها اقالة عميد الكلية .. اسامة سرايا بتاع الصور التعبيرية و "يوم ولدت مصر من جديد" اللي كان مانشيت الاهرام في عيد ميلاد الريس .. اكسلنت ناوناو (ممتاز القط لو مش واخد بالك) بتاع طشة الملوخية ..! عبد اللطيف المناوي اللي كان مطلع كوبري قصر النيل والعربيات معدية من عليه بمنتهى السيولة والهدوء ولا كأن الناس اللي في التحرير دي كانت في نفس اللحظة بتضرب برصاص قناصة ولا قنابل مولوتوف ولا اي حاجة .. ويوم ما فكر يتكلم على التظاهرات .. طلع المتظاهرين دول ناس مأجورة وعميلة وذات اجندات خارجية وبتدور على خراب البلد .. وفي رأيي التليفزيون المصري في الفترة دي كان احد اهم العوامل اللي اثارت الناس ضد الثورا ان لم تكن دفعت بيهم للاعتداء على من يعرفوهم منهم لأنهم خايفين على البلد طبعاً.

3- قانون تجريم الاعتصامات .. ده بقى اللي مسخرة .. انا سمعت من واحد صاحبي ان عصام شرف كان موجود في مظاهرة مجلس الوزراء كمتظاهر نازل يطالب باصلاح البلد بس معرفتش لحد دلوقت الكلام ده حقيقي ولا لأ .. بس بفرض انه حقيقي .. يعني الراجل ده واحد مننا .. اضرب بعصان الأمن المركزي لما اتفرم و بقنابل مسيلة للدموع لما اتعمى ومبقاش قادر ياخد نفس .. ورصاص مطاطي وحي .. ولكنه شايف ان القانون ده معمول لحماية الثورة

سيبك من ان الثورة اصلاً بدأت بمظاهرة .. واصدار هذا النوع من القوانين هو خيانة صريحة لمبدأ الاعتراف بها بغض النظر عن النية منه .. يعني الراجل بعد ما كان بيمشي معانا في المظاهرات ولما اتعين رئيس وزرا شيلناه على اكتافنا في التحرير .. بعد ما مسك الوزارة بشهر ييجي يقولنا المظاهرات ممنوعة ؟

ولكن من باب الأمانة لازم نذكر ان بلال فضل ذكر في احد مقالاته ان عصام شرف استاء بشدة من الطريقة التي تم الترويج بها لهذا القانون وأن الصورة الصحيحة ليه مختلفة تماماً وسبب سخط الناس عليه هي انها مش فاهماه صح .. وكلف وزير العدل انه يطلع في اكبر عدد من البرامج الحوارية عشان يوضح للناس الصورة الصحيحة للقانون .. والرجل فعلاً طلع واتكلم على التليفزين وفي الصحف وقال يا جماعة الغرض من القانون ده هو محاربة المظاهرات والاعتصامات الفئوية اللي بتعطل دولاب العمل .. لكنه لن يستخدم ضد مطالب الثورة وشبابها .. كلام جميل اوي .. بس معلشي اصل احنا عندنا عقدة من القوانين المايعة اللي ليها اكتر من تفسير .. ومفيش مثل اكثر وضوحاً من قانون الطوارئ اللي المفروض انه بتاع الارهاب لكنه كان all access pass على طول الخط يسمح للشرطة انها تعتقل اي حد في اي وقت لمجرد الاشتباه .. ناهيك عن بلاوي امن الدولة .. فأرجوك متطلعش تقوللي هو صحيح شكله يخوف بس هو المفروض يخوف الوحشين بس !

انا مش مع الناس اللي بتقول ان القانون ده بيسلب حق الانسان الطبيعي في التظاهر والاضراب عن العمل .. وان وجوده هو انتهاك صريح لحقوق الانسان .. لأن في نص القانون انه لا يسري مفعوله الا في ظل اعلان حالة الطوارئ .. اللي هي في الوضع الطبيعي بتعلن لما البلد يبقى حالها مش ولابد .. يبقى وجود القانون هو فعلاً لحفظ النظام في البلد في اوقات عدم الاستقرار .. والا كنا قلنا ان قانون الطوارئ نفسه هو انتهاك لحقوق الانسان.

وصحيح انا مش مع المظاهرات الفئوية لأن وقتها غير صحيح .. لكن الناس دي بتتظاهر في اوقات مش صحيحة نتيجة قلة وعي منهم .. يبقى الحل مش في قمع احتجاجتهم ولكن في اني اوعيهم بخطورة اللي بيعملوه وفي نفس الوقت أؤكد لهم انهم هايخدوا حقوقهم لما البلد تقف على رجليها تاني .. دا غير انك لازم تخلقلهم طريقة يقدروا يوصلوا بيها مظالمهم للحكومة بشكل شرعي ويكون رد الحكومة سريع وحاسم

4- الثلاثي المرح على رأي نوارة نجم .. المستفز في الموضوع انه بعد تنحي زفت بكام يوم .. قبضوا على عز والمغربي وجرانة والتهم كانت جاهزة ومتوضبة والاجراءات مشيت بسرعة وهما في الحجز من ساعتها .. عايز تقوللي انه بعد شهرين مش قادر تمسك تهمة على حد من الثلاثة ؟! .. مع العلم انه مفيش حد في مصر مش مقتنع انهم هما اصل الفساد السياسي في مصر .. صحيح انه القضاء مابيشتغلش بالقناعات الشخصية .. بس اللي عايز يلاقيلهم تهمة هايعرف .. الا اذا ..

يا ترى ماسكين حاجة على طنطاوي ؟ .. مش بعيد على الاطلاق .. لأن طنطاوي برضه مهواش الملاك البرئ اللي نزل من السما عشان ينقذ الثورة ويحتضن الثوار .. الراجل كان تلميذ وصديق مبارك .. وشئنا ام ابينا هو جزء من النظام السابق .. بس احنا بنفوت الحتة الأخيرة دي لأن الجيش هو آخر حيطة ممكن نتسند عليها في الوقت ده فا مش من المنطقي اننا نخبط فيه دلوقت بالذات .. دا غير ان جميع مواقفه حتى الآن لا تدل على نية غدر أو ما شابه ..

غير كده انا مش قادر افكر في اسباب تخليهم في مأمن عن المسائلة والاعتقال .. مرة عزمي يطلع يتكلم في مداخلة تليفزيونية .. ومرة فتحي سرور في حوار صحفي .. ولسه مستنيين صفوت لما نشوف هايطلع في هوا كمان .. مش بعيد نلاقيه نازلنا من الحنفية ..

اذا لم تستحي فافعل ما شئت.

5- ايه بقى موضوع المحاكمات اللي عمالة تتأجل دي ؟ حل الحزب الوطني .. قتلة خالد سعيد .. عز وجرانة والمغربي .. دا غير المحاكمات اللي مبدأتش اصلاً زي مبارك والعائلة .. قمة السخافة والاستفزاز ان محكمات زي دي يفضل يتماطل فيها بالشكل ده .. يعني قبل كده كنا بنقول انه النظام كان بيضغط على القضاء عشان يمشي المحاكمات زي ما هوا عايز .. اعداء النظام محاكماتهم سريعة وكلها بتنتهي بالسجن .. احباء النظام يفضلوا ياخدوا تأجيل ورا تأجيل لحد ما النس تنسى القضية اصلاً وفي الآخر ياخدوا براءة .. لكن واضح اننا كنا غلطانين .. القضاء المصري ادمن البطء والسماجة.

6- هي الشرطة فين ؟ .. ماتعرفش .. ناس بتقول مضربين وناس بتقول مش مضربين .. ناس بتقول خايفين وناس بتقول مش خايفين .. ناس بتقول موجودين واحنا اللي مابنشوفش وناس بتقول لأ مش موجودين وهما اللي بيستعمونا

منصور العيسوي يطلع يتكلم يقوللك ان الشرطة بتعود للشوارع تدريجياً ولا صحة لما اثير عن اضرابات واستقالات .. انا مش فاهم ايه موضوع تدريجياً دي .. هي كانت رجلها مكسورة فكانت قاعدة في السرير ؟ .. ليه الموضوع فيه صعوبة اوي كده في انهم يرجعوا لشغلهم ؟

7- طبعاً لازم هتلاقي ناس معترضة على الاعلان الدستوري بعد ما كانت معترضة على التعديلات الدستورية -وانا منهم- .. يقال ان الاعلان الدستوري اللي هايصدر بكرة مكون من عشرين مادة .. برغم ان الاستفتاء كان على 9 بس .. طيب مدام الجيش يقدر يصدر اعلانات دستورية وقت ما هو عايز .. ويحط فيها مواد على مزاجه من غير رأس الناس .. كان ايه لازمته من الأول الاستفتاء ؟

في رأيي الشخصي النية الأصلية للجيش كانت انه يعدل دستور 71 بالمواد الي جرى عليها الاستفتاء و يكمل شغل بيه لحد ما الجمعية التأسيسية تعمل دستور جديد .. لكنه لما وجد ان فيه أراء قوية وحشود ضخمة بتطالب باسقاط دستور 71 وعدم العودة ليه قرر ايثار السلامة وقاللك نبقى ضربنا عصفورين بحجر واحد .. راضينا اللي كانوا بيقولوا لأ في الاستفتاء واسقطنا الدستور القديم .. وراضينا اللي بيقولوا نعم و حطينا المواد المعدلة في الاعلان الدستوري .. وده اعتراف ضمني من الجيش ان الاستفتاء مكانش ليه اي لازمة !

طبعاً واضح من لهجة كلامي اني نازل المظاهرة ..

لأنه لما تبص للصورة المجملة لكل العوامل دي هاتشم ريحة مش كويسة ..

ايه اللي بيحصل بالضبط ؟ .. محدش عارف .. لكن المؤكد ان الجيش بيستجيب للضغط .. واذا كانت هي دي الطريقة الوحيدة في ايدينا عشان نضغط على الجيش يبقى من حقنا نستخدمها.

ليه بلوج ؟!

2011-03-29T11:57:00.000-07:00

انا ليه بكتب بلوج ؟

ايوة يعني ايه عندي المهم اوي اللي هاكتبه .. خصوصاً ان الفكرة من البلوج هي المشاركة مع الناس (أو هكذا اعتقد) .. ايه بقى المهم اوي اللي هاكتبه ويستحق ان الناس تقراه ؟

الحقيقة ممكن يبقى كل شيء .. او لا شيء على الاطلاق .. هي مجموعة اراء شخصية قد تكون متعلقة بأي شيء .. ارى فيها انها ليست كاملة الحماقة ولا تدل على جهل مطبق .. وارى انها تستحق الاحتفاظ بها على الاقل عشان اقدر في يوم من الايام ارجع اقراها واشوف انا كنت بفكر ازاي.

انا بكتب فصحى على عامية .. وفي معظم الاحوال لا استخدم علامات الترقيم و غالباً لا اراعي قواعد النحو لأني مش شاطر اوي فيها .. بحب افصل الجمل بنقطتين وليس بفاصلة كما يفعل العقلاء .. غالباً هتجد ان اسلوب كتابتي مستوحى من اسلوب الكاتب الساخر الرائع احمد خالد توفيق .. دي الجراوند رولز قبل ما نبدأ أوكى ؟

على بركة الله ..